واشنگٹن: (ویب ڈیسک) عالمی مالیاتی ادارے (آئی ایم ایف) نے چین اور امریکا کے مابین تجارتی جنگ کے حوالے سے خبردار کیا ہے کہ دونوں بڑی طاقتوں کے مابین تجارتی تنازع سے دنیا میں غربت میں ہولناک اضافہ ہو گا۔ گھریلو صنعتیں بند اور اشیائے صرف لوگوں کی پہنچ سے دور ہو جائیںگی.
بین الاقوامی خبر رساں ادارے کے مطابق عالمی مانیٹرنگ فنڈ نے تنبیہ کی ہے کہ اگر امریکا اور چین کے مابین معاشی جنگ یوں ہی جاری رہی اور دونوں ممالک ایک دوسرے کی درآمدی اشیاء پر ٹیکس لگاتے رہے تو اس سے غربت میں ہولناک اضافہ ہوجائے گا اور یہ دنیا رہنے کے لیے خطرناک جگہ بن جائے گی۔ عالمی مالیاتی فنڈ نے معیشت کی عالمی ترقی کے حوالے سے اپنی تجزیاتی رپورٹ میں کہا ہے کہ آئندہ سال معیشت کی عالمی ترقی کم تر سطح پر 3.7 فیصد رہے گی۔ معیشت کی عالمی ترقی کے موجودہ اشاریے ہمیں اپنی سمت تبدیل کرنے کے لیے خبردار کررہے ہیں ہے۔
عالمی مالیاتی فنڈ کے چیف اکنامسٹ نے کہا ہے کہ تجارت پر پابندی سے مقامی اور بین الاقوامی معاشی سرگرمیوں پر منفی اثرات مرتب ہوں گے جس سے بیروزگاری میں اضافہ ہوگا، گھریلو صنعتیں بند اور اشیائے صرف لوگوں کی پہنچ سے دور ہوجائیں گی۔ یہ ہولناک منظر ہوگا۔ واضح رہے کہ امریکی صدر ڈونلڈ ٹرمپ نے اپنے دور صدارت میں چین سے معاشی جنگ کو پسندیدہ قرار دیتے ہوئے ٹیکس کی شرح میں اضافہ کردیا گیا تھا جس کے ردعمل پر چین نے بھی امریکی شیاء پر ٹیکس کی شرح کو بڑھادیا تھا اور یہ سلسلہ تاحال جاری ہے۔
