کراچی: (دنیا نیوز) رواں مالی سال کے پہلے سات ماہ میں ملکی برآمدات میں 1 ارب 77 کروڑ ڈالر اضافہ ہو گیا۔
رپورٹ کے مطابق جولائی سے جنوری ملکی برآمدات کا حجم 19 ارب 55 کروڑ ڈالر تک پہنچ گیا، گزشتہ مالی سال کی اسی مدت کے مقابلے برآمدات میں 10 فیصد اضافہ ریکارڈ کیا گیا۔
سات ماہ میں درآمدات میں بھی 6.95 فیصد اضافہ ریکارڈ کیا گیا جس سے درآمدات کا حجم 33 ارب ڈالر سے تجاوز کر گیا۔
رپورٹ کے مطابق جولائی سے جنوری تجارتی خسارے میں 2.84 فیصد اضافہ ہوا، تجارتی خسارے کا حجم 13 ارب 48 کروڑ ڈالر ریکارڈ کیا گیا۔
ادارہ شماریا ت کے مطابق دسمبر کے مقابلے جنوری 2025 میں برآمدات میں 0.31 فیصد اضافہ ہوا، جنوری 2025 میں برآمدات کا حجم 2 ارب 92 کروڑ ڈالر رہا۔
رپورٹ کے مطابق جنوری 2024 کے مقابلے گزشتہ ماہ برآمدات میں 4.59 فیصد اضافہ ہوا، دسمبر کے مقابلے جنوری 2025 میں تجارتی خسارے میں 5.47 فیصد کمی آئی۔
ادارہ شماریات کے مطابق جنوری میں تجارتی خسارہ کم ہو کر 2 ارب 31 کروڑ ڈالر رہ گیا، جنوری میں درآمدات میں 2.33 فیصد کمی ہوئی اور حجم 5 ارب 23 کروڑ ڈالر رہا۔
رپورٹ کے مطابق جنوری 2024 کے مقابلے گزشتہ ماہ تجارتی خسارہ 17.78 فیصد بڑھ گیا۔
