کراچی: (دنیا نیوز) پاکستان سٹاک ایکسچینج میں شدید مندی کا رجحان برقرار ہے، 100 انڈیکس میں ایک ہزار سے زائد پوائنٹس کی کمی ہوئی ہے۔
جمعرات کو سٹاک ایکسچینج کے 100 انڈیکس میں کاروبار کے آغاز پر ایک موقع پر 230 پوائنٹس کا اضافہ ریکارڈ کیا گیا جس کے بعد انڈیکس ایک لاکھ 12 ہزار 165 پوائنٹس پر ٹریڈ کرتے دیکھا گیا۔
بعدازاں پاکستان سٹاک مارکیٹ میں شدید مندی دیکھنے کو ملی اور 100 انڈیکس میں ایک ہزار 537 پوائنٹس کی کمی ہو گئی جس کے بعد 100 انڈیکس ایک لاکھ 10 ہزار 398 پوائنٹس پر ٹریڈ کر رہا ہے۔
یاد رہے کہ منگل کو بھی سٹاک مارکیٹ میں منفی کاروبار کے باعث 100 انڈیکس ایک لاکھ 12 کی حد بھی برقرار نہیں رکھ سکا تھا۔
دوسری جانب ایکسچینج کمپنیز ایسوسی ایشن کے مطابق ڈالر کی قیمت میں کمی ہو گئی ہے، انٹر بینک میں امریکی کرنسی کی قیمت 6 پیسے گرنے کے بعد 278 روپے 90 پیسے ہو گئی ہے۔
