اسلام آباد: (دنیا نیوز) ماہ مبارک اور عید کے دوران ناجائز منافع خوروں کے خلاف سخت کارروائی کا فیصلہ کر لیا گیا۔
وفاقی وزیر احسن اقبال کے زیر صدارت اعلیٰ سطح کا اجلاس ہوا، اجلا میں رمضان المبارک اور عید کے دوران اشیا خور و نوش کی قیمتوں بارے تفصیلی جائزہ لیا گیا، گھی اور چینی سمیت ضروری اشیاء کی قیمتوں میں استحکام بارے تبادلہ خیال کیا گیا۔
اجلاس میں اشیا ضروریہ کی قیمتوں میں استحکام کے لیے سخت اقدامات کا فیصلہ کیا گیا، وفاقی وزیر نے ناجائز منافع خوروں کے خلاف سخت کارروائی کی ہدایت کر دی۔
صوبائی نمائندوں نے اجلاس میں اشیاء ضروریہ کے حوالے سے بریفنگ دی، صوبائی حکومتوں نے قیمتوں اور سٹاک کی صورتحال سے اجلاس کو آگاہ کیا۔
وفاقی وزیر احسن اقبال نے کہا کہ اشیاء کی قیمتیں مستحکم رکھنے کیلئے تمام اقدامات بروئے کار لائے جائیں گے، صوبائی اور ضلعی انتظامیہ مصنوعی قلت پیدا کرنے والوں کے خلاف کارروائی کرے۔
احسن اقبال نے کہا کہ رمضان المبارک اور عید کے دوران غیر ضروری مہنگائی پر قابو پانے کے لئے ہر ممکن اقدامات کریں، سپلائی میں کسی قسم کی رکاوٹ سے بچنے کے لیے پیشگی اقدامات کیے جائیں، اشیا خور و نوش کی موثر مارکیٹ مانیٹرنگ کی جائے۔
