کراچی: (دنیا نیوز) وزیر خزانہ محمد اورنگزیب نے کہا کہ پاکستانی پراڈکٹس کی عالمی منڈیوں تک رسائی یقینی بنانا ہوگی، ریکوڈک پراجیکٹ بہت اہمیت کا حامل ہے، 2028 کے بعد ہماری ایکسپورٹ میں اضافہ ہوگا۔
چیمبر آف کامرس کی تقریب سے خطاب کرتے ہوئے وزیر خزانہ محمد اورنگزیب کا کہنا تھا کہ تاجروں کا ملکی ترقی میں کلیدی کردار ہے، ملک میں معاشی استحکام کیلئے کام کر رہے ہیں، سرمایہ کاروں کو سہولیات کی فراہمی یقینی بنا رہے ہیں۔
وزیر خزانہ نے کہا کہ انڈسٹری کی ترقی کیلئے مل کر کام کرنا ہوگا، مہنگائی کی شرح میں کمی ہو رہی ہے، منرلز انویسٹمنٹ فورم کا انعقاد اس بات کا عکاس ہے کہ ہماری سمت درست ہے، فورم میں چین، یورپ، امریکا و دیگر ممالک سے نمائندوں نے شرکت کی۔
انہوں نے کہا کہ سٹاک مارکیٹ میں اتار چڑھاؤ جاری رہتا ہے، پالیسی ریٹ میں کمی سے کاروبار میں استحکام آرہا ہے، ہمارا اصل مقصد عام آدمی کو ریلیف پہنچانا ہے۔
محمد اورنگزیب نے کہا کہ روزانہ کی بنیاد پر دالوں، چینی و دیگر اشیا کی قیمتوں کو دیکھ رہے ہیں، وزیراعظم شہباز شریف معیشت کے استحکام کیلئے دن رات کوشاں ہیں، افراط زر کم ہونے کا فائدہ عام آدمی کو ہونا چاہیے۔
انہوں نے کہا کہ شرح سود 22 فیصد سے کم ہوکر 12 فیصد پرآچکی ہے، تنخواہ دار طبقہ اپنے گوشوارے اب خود بھر سکتا ہے۔
