وزیر خزانہ کی ترک ہم منصب سے ملاقات، ڈیری، لائیوسٹاک میں سرمایہ کاری کی دعوت

واشنگٹن: (دنیا نیوز) وفاقی وزیر خزانہ سینیٹر محمد اورنگزیب کی واشنگٹن ڈی سی میں آئی ایم ایف، ورلڈ بینک سپرنگ اجلاس کے موقع پر ترکی کے وزیر خزانہ مہمت شیمشیک سے ملاقات ہوئی۔

وزیر خزانہ نے پاکستان اور ترکی کے درمیان تاریخی اور برادرانہ تعلقات کو اجاگر کرتے ہوئے دونوں ممالک کے مابین تجارت اور سرمایہ کاری کے فروغ کی وسیع گنجائش پر زور دیا۔

انہوں نے اس بات کا اعتراف کیا کہ موجودہ تجارتی و سرمایہ کاری کی سطح دونوں ممالک کی صلاحیت کے مطابق نہیں ہے۔

محمد اورنگزیب نے ترک سرمایہ کاروں اور تاجروں کو پاکستان کے ڈیری، پنیر اور لائیو سٹاک کے شعبوں میں سرمایہ کاری کے مواقع سے استفادہ کرنے کی دعوت دی۔

وزیر خزانہ نے ترک حکومت کی ہائی ٹیک شعبوں میں جدت اور ویلیو ایڈیشن کو فروغ دینے کی پالیسی کو بھی سراہا۔

نیدرلینڈز کی ملکہ میکسیما سے ملاقات

دریں اثنا وفاقی وزیر برائے خزانہ و محصولات محمد اورنگزیب نے واشنگٹن ڈی سی میں نیدرلینڈز کی ملکہ میکسیما سے ملاقات کی۔

وزیر خزانہ نے پاکستانی خواتین کی مالی شمولیت سے متعلق پیش رفت سے آگاہ کیا، جس میں بین الاقوامی شراکت داروں کی مدد سے نیشنل فنانشل انکلوژن اسٹریٹجی کے نفاذ کا خصوصی ذکر کیا گیا۔

محمد اورنگزیب نے اس بات پر زور دیا کہ خواتین اور بچیوں کی تعلیم، مالی شمولیت، کاروباری مواقع اور بااختیاری حکومت کی اولین ترجیحات میں شامل ہیں۔

وزیر خزانہ نے ڈیجیٹل رسائی کو بڑھانے اور اداروں کے درمیان مؤثر ڈیٹا کے تبادلے کی ضرورت پر بھی زور دیا تاکہ مالی شمولیت کی کوششوں کو مزید فروغ دیا جا سکے۔