اسلام آباد: (دنیا نیوز) سیلاب متاثرہ علاقوں میں بجلی کی بحالی پر پاور ڈویژن کی 4 ستمبر تک کی رپورٹ جاری کر دی گئی۔
پاور ڈویژن کی رپورٹ کے مطابق پیسکو کے علاقے سوات، بنر، شانگلہ، صوابی اور ڈی آئی خان کے 12 گرڈز اور 91 فیڈرز متاثر ہوئے، جن میں سے پیسکو کے 85 فیڈرز مکمل اور 6 جزوی طور پر بحال ہو چکے ہیں، 463375 متاثرہ صارفین میں سے 459921 صارفین کیلئے بجلی بحال کر دی گئی۔
پیسکو کے باقی 3454 متاثرہ صارفین کیلئے بجلی کی بحالی کا کام 4 سے 12 ستمبر تک مکمل کر لیا جائے گا، پیسکو کے زیرِ انتظام علاقے صوابی اور ڈی آئی خان میں بجلی کی بحالی کا کام مکمل ہو چکا ہے۔
رپورٹ میں بتایا گیا کہ گیپکو کے 11 گرڈز اور 103 متاثرہ فیڈرز میں سے 88 فیڈرز مکمل اور 16 جزوی طور پر بحال کر دیئے گئے، گیپکو کے 735987 متاثرہ صارفین میں سے 660509 صارفین کیلئے بجلی بحال ہو چکی ہے، جبکہ باقی 75478 متاثرہ صارفین کیلئے بجلی بحالی کا کام سیلاب کا پانی اترنے پر مکمل کر لیا جائے گا۔
اسی طرح لیسکو میں لاہور، اوکاڑہ، شيخوپورہ، قصور اور ننکانہ کے 67 متاثرہ فیڈرز میں سے 44 مکمل اور 23 جزوی طور پر بحال ہو چکے ہیں، لیسکو کے 73634 متاثرہ صارفین میں سے 59067 صارفین کیلئے بجلی بحال کر دی گئی۔
لیسکو کے باقی 14567 متاثرہ صارفین کیلئے بجلی کی بحالی کا کام 4 سے 5 ستمبر تک مکمل کر لیا جائے گا۔
پاور ڈویژن کی رپورٹ کے مطابق فیسکو کے زیرِ انتظام علاقوں ٹی ٹی سنگھ، فیصل آباد، چنیوٹ، جھنگ، سرگودھا، میانوالی اور ڈی آئی خان کے 26 گرڈ اور 77 فیڈرز متاثر ہوئے، متاثرہ فیڈرز میں سے 19 مکمل اور 54 عارضی طور پر بحال کر دیا گیا۔
فیسکو 198616 متاثرہ صارفین میں سے 93331 صارفین کیلئے بجلی بحال کر دی گئی ہے، جبکہ باقی 105285 متاثرہ صارفین کیلئے بجلی کی بحالی کا کام پانی اترنے پر 4 سے 5 ستمبر تک مکمل کر لیا جائے گا۔
اسی طرح میپکو کے زیرِ انتظام علاقوں میں 139 فیڈرز متاثر ہوئے، جس سے میپکو کے زیرِ انتظام علاقوں میں 96537 صارفین متاثر ہوئے، میپکو کے زیرِ انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا۔
رپورٹ میں بتایا گیا کہ ٹیسکو کے علاقے شمالی وزیرستان اور خیبر کے 17 فیڈرز متاثر ہوئے جن میں سے 2 فیڈر مکمل اور 11 فیڈر عارضی طور پر بحال کر دیئے گئے، ٹیسکو کے 31599 متاثرہ صارفین میں سے 7302 صارفین کیلئے بجلی بحال ہو چکی ہے، جبکہ باقی 24297 متاثرہ صارفین کیلئے بجلی کی بحالی کا کام 5 ستمبر شام 5 بجے تک مکمل ہونے کی توقع ہے۔
پاور ڈویژن رپورٹ کے مطابق ہیزیکو کے زیرِ انتظام علاقے مانسہرہ کے 3 متاثرہ فیڈر کو مکمل طور پر بحال کر دیا گیا ہے، مجموعی طور پر 49 گرڈ اور 497 متاثرہ فیڈرز میں سے 239 کو مکمل اور 249 کو عارضی طور پر بحال کیا جا چکا ہے، یوں 1623413 متاثرہ صارفین میں سے 1307559 صارفین کیلئے بجلی بحال کر دی گئی، باقی 315854 متاثرہ صارفین کیلئے بجلی کی بحالی ترجیح ہے۔
