اسلام آباد: (دنیا نیوز) وزیراعظم شہباز شریف نے سٹاک ایکسچینج میں ہنڈرڈ انڈیکس ایک لاکھ 56 ہزار پوائنٹس کی بلند ترین سطح عبور کرنے پر اظہار اطمینان کیا ہے۔
اپنے بیان میں وزیراعظم شہباز شریف نے کہا کہ پاکستان سٹاک ایکسچینج کا تاریخی سطح عبور کرنا کاروباری برادری و سرمایہ کاروں کے حکومت کی پالیسیوں پر اعتماد کا مظہر ہے، اللہ کے فضل و کرم سے ملکی ترقی کا سفر معاشی ٹیم کی محنت کی وجہ سے جاری و ساری ہے۔
ان کا کہنا تھا کہ حال ہی میں چین کے نجی شعبے کے ساتھ پاکستان کی نجی کمپنیوں کے اربوں ڈالر کے معاہدے و مفاہمتی یادداشتوں پر دستخط ہوئے۔
شہباز شریف نے مزید کہا کہ ملک میں سرمایہ کاری میں اضافے سے صنعتیں لگیں گی، برآمدات میں اضافہ ہوگا اور روزگار کے مزید مواقع پیدا ہوں گے، ملکی معاشی سمت کی بہتری اور ترقی کے سفر پر گامزن کرنے کیلئے معاشی ٹیم کی کوششیں قابل ستائش ہیں۔
