چینی کی قیمت بلند ترین سطح پر پہنچ گئی، ادارہ شماریات کی رپورٹ جاری

اسلام آباد:(دنیا نیوز) ملک میں چینی کی زیادہ سے زیادہ فی کلو قیمت 229 روپے تک پہنچ گئی۔

ادارہ شماریات کے مطابق گزشتہ ایک ہفتے میں کوئٹہ میں چینی کی فی کلوقیمت میں19 روپے تک اضافہ ہوا اور فی کلو قیمت 210 روپے سے بڑھ کر229 روپے تک ہوگئی۔

ادارہ شماریات کا کہنا ہے کہ کوئٹہ کے شہری ملک میں سب سے مہنگی 229 روپے تک فی کلو چینی خریدنے پر مجبور ہیں، پشاور میں چینی کی زیادہ سے زیادہ فی کلو قیمت 200 روپے تک ہے، کراچی اور اسلام آباد میں چینی کی زیادہ سے زیادہ فی کلو قیمت 195روپے تک ہے جب کہ راولپنڈی میں چینی کی زیادہ سے زیادہ فی کلو قیمت190روپے تک ہے۔

رپورٹ میں بتایا گیا کہ گزشتہ ایک ہفتے میں چینی کی اوسط فی کلو قیمت میں 2 روپے ایک پیسے کمی ہوئی اور چینی کی اوسط فی کلو قیمت 185روپے47  پیسے پر آگئی۔

ادارہ شماریات کا مزید کہنا تھا کہ گزشتہ ہفتے تک ملک میں چینی کی اوسط فی کلو قیمت 187 روپے 48 پیسے تھی، ایک سال قبل ملک میں چینی کی اوسط فی کلو قیمت 132روپے24پیسے تھی۔