لاہور: (دنیا نیوز) پاکستان اور جنوبی افریقہ کے درمیان دوسرا ٹی ٹوئنٹی آج کھیلا جائے گا، ایک صفر خسارے کی شکار شعیب الیون نے سیریز کے بقیہ دونوں میچ جیت کر لگاتار بارہویں سیریز فتح پر نظریں جما لیں۔ فف ڈوپلیسز کی جگہ ڈیوڈ ملر پروٹیز کی قیادت کریں گے۔
شاہین کیپ ٹاؤن کا ادھار، آج جوہانسبرگ میں چکانے کو تیار، ایک صفر کی برتری سے ہمکنار پروٹیز جیت اپنے نام کرنے کو بے قرار ہیں۔ سیریز میں اِن رہنے کیلئے پاکستان کو ہر صورت فتح درکارہے۔
دوسرے ٹی ٹونٹی کا آج شام ساڑھے پانچ بجے آغاز ہو گا۔ انجری کے شکار کوئنٹن ڈی کاک سیریز سے باہر ہیں۔ کپتان ڈو پلیسز آرام کریں گے اور ڈیوڈ ملر میزبان ٹیم کی کمان سنبھالیں گے۔ شعیب الیون کے لئے سیریز میں کم بیک کرنے کا موقع ہے جس پر انھوں نے جیت کیلئے غلطیاں نہ دہرانے کا عزم کیا ہے۔ پروٹیز پر بھاری عثمان شنواری نے پھر وکٹیں اڑانے کی تیاری کر لی۔ شعیب ملک، بابر اعظم اور فخرزمان قومی ٹیم کی امیدوں کا محور ہوں گے۔
گرین شرٹس پہلے ٹی ٹونٹی میں ایک سو بانوے سکور کے جواب میں 9 وکٹوں پر ایک سو چھیاسی رنز بنا سکے تھے۔
