اسلام آباد: (دنیا نیوز) وزارتِ بین الصوبائی رابطہ کا پاکستان کرکٹ بورڈ کو ایک اور خط ، ذکااشرف کی مینجمنٹ کمیٹی کو امور کے حوالے سے آگاہ کردیا گیا۔
وزارتِ بین الصوبائی رابطہ کی جانب سے جاری خط میں پی سی بی مینجمنٹ کمیٹی کو بورڈ آف گورنرز کی تشکیل اور جلد سے جلد چیئرمین پی سی بی کے الیکشن کروانے کی ہدایت کی گئی۔
خط میں لکھا گیا کہ مینجمنٹ کمیٹی روز مرہ کے امور دیکھے، اعلیٰ عہدے پر تقرریاں نہ کرے، پی سی بی مینجمنٹ کمیٹی کو تین ماہ سے زائد توسیع نہیں دی جائے گی۔
واضح رہے کہ وزارتِ بین الصوبائی رابطہ کی جانب سے پی سی بی مینجمنٹ کمیٹی کو تین ماہ کی توسیع کا نوٹیفکیشن 4 نومبر کو جاری ہوا تھا۔
یہ بھی پڑھیں: چیئرمین پی سی بی کی تقرری کیخلاف درخواست پر سماعت دوہفتوں کیلئے ملتوی
وفاقی کابینہ نے مینجمنٹ کمیٹی کو چیئرمین پی سی بی کے انتخابات، بورڈ آف گورنرز تشکیل دینے کی ذمہ داری سونپی ہے تاہم تاحال مینجمنٹ کمیٹی چیئرمین پی سی بی کے انتخابات، بورڈ آف گورنرز تشکیل دینے میں ناکام رہی۔
وزارت کی جانب سے آگاہ کیا گیا کہ وسائل کو استعمال کرتے ہوئے اپنے ٹاسک کو پورا کرنے کی کوشش کریں اور وزارت سے رپورٹ شیئر کریں، مینجمنٹ کمیٹی کی جانب سے اعلیٰ عہدے پر تقرریوں کو اختیارات کا غلط استعمال سمجھا جائےگا۔
