لاہور: (ویب ڈیسک) پاکستان سپر لیگ ( پی ایس ایل) میں نئی تاریخ رقم ہوگئی، 3 بھائی اور وہ بھی فاسٹ باؤلر ایک ہی ٹیم میں شامل ہوگئے۔
لاہور میں پی ایس ایل 9 کے پلیئرز ڈرافٹ کی تقریب منعقد کی گئی جس میں پاکستان سپر لیگ کے نویں ایڈیشن 2024 کیلئے ٹیموں کی تشکیل مکمل کی گئی۔
تقریب میں فرنچائزز کے مالکان، چیئرمین پی سی بی منیجمنٹ کمیٹی ذکا اشرف اور کرکٹرز نے شرکت کی۔
پاکستان سپر لیگ 9 کے سلسلے میں جہاں ڈرافٹنگ کے دوران فرنچائزز نے بڑے ناموں کو منتخب کیا وہیں اس بار ایک نئی تاریخ بھی رقم ہو گئی ہے۔
اسلام آباد یونائیٹڈ نے "شاہ برادرز" نسیم شاہ کے بعد ان کے چھوٹے بھائی حنین اور عبید شاہ کو بھی اپنی ٹیم کا حصہ بنا لیا۔
نسیم شاہ کے چھوٹے بھائی حنین شاہ نے نیشنل ٹی 20 کپ میں دھوم مچائی جبکہ عبید شاہ پاکستان کی انڈر 19 ٹیم میں شامل ہیں جو اس وقت دبئی میں ایشیا کپ کھیل رہی ہے۔
اسلام آباد یونائیٹڈ نے حنین اور عبید شاہ کو پی ایس ایل 9 کیلئے ایمرجنگ کیٹیگری میں اپنی ٹیم کا حصہ بنایا، نسیم شاہ ڈرافٹنگ سے پہلے ہی کوئٹہ گلیڈی ایٹرز کو خیر باد کہہ کر اسلام آباد یونائیٹڈ کا حصہ بن گئے تھے۔
واضح رہے کہ یہ پہلی بار ہوا ہے کہ ایک ٹیم میں 3 بھائی ایک ساتھ شامل ہیں اور وہ تینوں ہی فاسٹ باؤلر ہیں۔
