کیپ ٹاؤن: (ویب ڈیسک) آئی سی سی چیمپئنز ٹرافی سے قبل جنوبی افریقی ٹیم کی مشکلات میں مزید اضافہ ہوگیا۔
فاسٹ باؤلر جیرالڈ کوئیٹزی انجری کے باعث پاکستان میں ہونے والی سہ فریقی سیریز اور آئی سی سی چیمپئنز ٹرافی سے باہر ہو گئے ہیں۔
جنوبی افریقی ٹیم نے گزشتہ ماہ آئی سی سی چیمپئنز ٹرافی کے سکواڈ کا اعلان کیا تھا جس کے بعد سکواڈ میں شامل فاسٹ باؤلر اینرک نوکیا انجری کی وجہ سے ٹورنامنٹ سے باہر ہوئے۔
نوکیا کی انجری کے بعد جیرالڈ کوئیٹزی کا نام ان کے متبادل کے طور پر چیمپئنز ٹرافی اور سہ افریقی سیریز کے سکواڈ میں شامل کیا گیا تھا لیکن اب کوئیٹزی بھی انجری کا شکار ہو کر سہ فریقی سیریز اور چیمپئنز ٹرافی سے باہر ہو گئے ہیں۔
کرکٹ ساؤتھ افریقا کے مطابق کوئیٹزی نے بدھ کو ٹریننگ کے دوران باؤلنگ کرتے ہوئے اپنی ران میں کھچاؤ محسوس کیا، فاسٹ باؤلر کا میڈیکل ٹیم نے معائنہ کیا جس میں ان کی انجری کو شدید قرار دیا گیا جس کی وجہ سے کوئیٹزی آئی سی سی چیمپئنز ٹرافی کے لیے ٹیم کو دستیاب نہیں ہوں گے۔
رپورٹ کے مطابق نوجوان فاسٹ باؤلنگ آل راؤنڈر کوربن بوش اور لوتھو سپاملا چیمپئنز ٹرافی میں کوئیٹزی کے متبادل کے لیے مضبوط امیدوار ہیں۔
واضح رہے کہ آئی سی سی چیمپئنز ٹرافی کا آغاز 19 فروری سے ہو رہا ہے، جنوبی افریقا کی ٹیم اپنا پہلا میچ 21 فروری کو افغانستان کے خلاف کراچی میں کھیلے گی۔
