لاہور: (دنیا نیوز) قذافی سٹیڈیم کی ریکارڈ مدت میں تکمیل پر چیئرمین پی سی بی محسن نقوی کی جانب سے 1500 سے زائد ورکرز کے اعزاز میں خصوصی ظہرانہ دیا گیا۔
ورکرز نے مٹن قورمہ، چکن روسٹ، بیف پلاؤ اور گرما گرم لائیو نان پر مشتمل لنچ کیا ،زردہ، رائتہ، سلاد، منرل واٹر ، کولڈ ڈرنکس اور کشمیری چائے سے مزدوروں کی تواضع کی گئی، چیئرمین پی سی بی محسن نقوی نے مزدوروں کے ساتھ ان کی نشستوں پر جا کر ملاقات کی اور ساتھ بیٹھ کر لنچ کیا، مزدوروں نے چیئرمین پی سی بی محسن نقوی کے ساتھ سیلفیاں اور تصویریں بھی بنوائیں۔
چیئرمین پی سی بی محسن نقوی نے دن رات محنت کر کے سٹیڈیم مکمل کرنے پر ورکرز کا شکریہ ادا کیا اور شاباش دی ،مزدوروں کو شاندار الفاظ میں خراج تحسین پیش کیا اور کل پاکستان اور نیوزی لینڈ کے درمیان کھیلا جانیوالا میچ دیکھنے کی دعوت دی۔
محسن نقوی نے ورکرز سے گفتگو کرتے ہوئے کہا کہ آپ قوم کے ہیرو ہیں، سب مبارکباد کے مستحق ہیں جس پر مزدوروں نے کہا کہ آپ نے کمال کر دیا، ہم 3 ماہ سے قذافی سٹیڈیم میں ہیں، سٹیڈیم دیکھ کر دل خوش ہو گیا ہے، آپ کی محنت رنگ لائی ہے، ہم خود آپ کو سٹیڈیم میں صبح شام دیکھتے رہے ہیں۔
چیئرمین پی سی بی نے کہا کہ قذافی سٹیڈیم آپ کا سٹیڈیم ہے، سٹیڈیم کو ریکارڈ مدت میں مکمل کرنے میں آپ کی دن رات کی محنت شامل ہے۔
