لاہور( دنیا نیوز) قذافی سٹیڈیم کی افتتاحی تقریب کا آغاز، وزیراعظم شہباز شریف نے سٹیڈیم کا افتتاح کیا۔
قذافی سٹیڈیم لاہور کی افتتاحی تقریب میں وزیراعظم محمد شہباز شریف، وزیراعلیٰ پنجاب مریم نواز شریف نے چیئرمین پی سی بی اور قومی ٹیم کے کھلاڑیوں سے ملاقات کی۔
پی سی بی ذرائع کے مطابق اپ گریڈیشن کے بعد قذافی سٹیڈیم میں 32 ہزار شائقین کے بیٹھنے کی گنجائش ہو گئی ہے، ہفتے کو قذافی سٹیڈیم میں ٹرائی سیریز کا افتتاحی میچ پاکستان اور نیوزی لینڈ کے درمیان کھیلا جائے گا۔
افتتاحی تقریب سے خطاب کرتے ہوئے وزیر اعظم شہباز شریف نے کہا کہ آج بہت خوشی کا دن ہے ، قذافی سٹیدیم کی تعمیر نو بہت شاندار طریقے سے ہوئی ، سب نے ایک ٹیم کے طور پر ریکارڈ 117دنوں میں منصوبہ مکمل کرکے ناممکن کو ممکن بنایا۔
.jpg)
انہوں نے کہا کہ محسن نقوی کی عادت ہے کہ وہ اچھے کام کرتے ہیں ان کو لندن کی سیر کراتے ہیں ، سٹیڈیم کی تعمیر کیلئے 2500 افراد نے کام کیا انہیں بھی لندن کی سیر کرائیں گے، شہباز سپیڈ ماضی اب محسن سپیڈ چل رہی ہے۔
محمد شہباز شریف نے کہا کہ چیمپئنز ٹرافی قومی ٹیم کی جیت کی منتظر ہے ، قومی کرکٹ ٹیم کے کھلاڑیوں کی مدد کریں گے، ہم اس دن کا بھی انتظار کررہے ہیں جب قومی ٹیم بھارت کو شکست دے گی۔
وزیر اعظم کا کہنا تھا کہ بابر اعظم اور محمد رضوان سے بہت سی امیدیں ہیں، یہ ٹرافی اللہ تعالیٰ پاکستان کی جھولی میں ڈالے گا، آخرمیں انہوں نے محسن نقوی کے کام کو سراہتے ہوئے کہا کہ آپ نے اپنے اقدامات سے قوم کے دل جیت لیے ہیں۔
محسن نقوی
چیئرمین پی سی بی محسن نقوی نے کہا کہ ہمارا ٹارگٹ تھا چیمپئنز ٹرافی سے قبل قذافی سٹیڈیم کو مکمل کریں گے،بہت سے مزدور ایسے تھے جو 3،3 ماہ سے گھر نہیں گئے۔
ایاز صادق
سپیکر ایاز صادق کا تقریب سے خطاب کرتے ہوئے کہنا تھا کہ کئی بار اس قذافی سٹیڈیم میں کھیل چکا ہوں ، قومی کھلاڑی ہمارے سر کے تاج ہیں، ٹیم ہار جائے تو ایسے کمنٹس دیتے ہیں تو غلط ہے۔
