لاہور: (ویب ڈیسک) آئی سی سی چیمپئنز ٹرافی 2025 کا آغاز 19 فروری سے ہو رہا ہے، ایونٹ میں شامل 8 ٹیموں کی جانب سے بھرپور تیاریاں جاری ہیں لیکن بد قسمتی سے کئی ٹیمیں اپنے اہم ترین کھلاڑیوں کے بغیر ہی میدان میں اتریں گی۔
ایونٹ شروع ہونے سے قبل ہی متعدد کھلاڑی مختلف وجوہات، خصوصاً انجری کے باعث ایونٹ سے باہر ہو چکے ہیں جن میں ایسے بڑے نام بھی شامل ہیں جن پر ان کی ٹیم کافی انحصار کرتی تھی۔
آئی سی سی چیمپئنز ٹرافی کیلئے ٹیموں کی جانب سے سکواڈ کا اعلان کیا گیا لیکن بدقسمتی سے کھلاڑیوں کے انجرڈ ہونے کی وجہ سے کئی ٹیموں کو ڈیڈلائن سے قبل اپنے سکواڈ میں تبدیلی بھی کرنا پڑی۔
یہاں ان اہم کھلاڑیوں کا ذکر کیا جارہا ہے جو آئی سی سی چیمپئنز ٹرافی 2025 میں شائقین کرکٹ کو نظر نہیں آئیں گے۔
صائم ایوب
22 سالہ صائم ایوب جنوبی افریقا کے خلاف ٹیسٹ سیریز میں ٹخنے کی انجری کے باعث آئی سی سی چیمپئنز ٹرافی سے باہر ہو گئے ہیں۔
چیمپئنز ٹرافی کی میزبان ٹیم پاکستان کے لیے صائم ایوب کی انجری ایک بڑا دھچکا ہے، نوجوان بیٹر نے صرف 9 ون ڈے میچز میں 3 سنچریاں سکور کر کے خود کو پاکستان کے مستقبل کا اہم بیٹر ثابت کیا ہے۔
پاکستان کو اپنے ٹائٹل کا دفاع کرنا ہے اور صائم کی غیر موجودگی کے سبب قومی ٹیم کو نئی حکمت عملی بنانا ہو گی۔
جسپریت بمراہ
بھارتی فاسٹ بولر جسپریت بمراہ بھی انجری کی وجہ سے آئی سی سی چیمپئنز ٹرافی میں نظر نہیں آئیں گے، یہ بھارت کے لیے ایک بہت بڑا دھچکا ہے کیوں کہ بمراہ اس وقت بہترین فارم میں تھے۔
بمراہ کو آسٹریلیا کے خلاف بارڈر گواسکر ٹرافی کے دوران کمر کی انجری ہوئی تھی جو توقع کے مطابق ٹھیک نہیں ہو سکی۔
بھارتی ٹیم چیمپئنز ٹرافی میں اپنے سٹار فاسٹ بولر کی کمی شدت سے محسوس کرے گی اور ان کی جگہ کم تجربہ کار بولر ہرشیت رانا کو سکواڈ میں شامل کیا گیا ہے۔
پیٹ کمنز
آئی سی سی چیمپئنز ٹرافی سے قبل جس ٹیم کو سب سے زیادہ مشکلات کا سامنا کرنا پڑا وہ ورلڈ چیمپئن آسٹریلیا ہے جس کے 5 اہم کھلاڑی ٹورنامنٹ سے باہر ہوئے۔
سب سے اہم نام آسٹریلوی کپتان پیٹ کمنز کا ہے جو ٹخنے کی انجری کی وجہ سے آئی سی سی چیمپئنز ٹرافی سے باہر ہوئے، ان کی جگہ سٹیو سمتھ ٹیم کی کپتانی کریں گے۔
پیٹ کمنز کی غیر موجودگی میں آسٹریلیا کو نہ صرف ان کی بولنگ بلکہ ان کی بہترین کپتانی سے بھی محروم ہونا پڑے گا۔
مچل سٹارک
آسٹریلیا کے سب سے اہم فاسٹ بولر مچل سٹارک نے آئی سی سی چیمپئنز ٹرافی سے دستبرداری کا اعلان کیا جس کی وجہ ذاتی معاملات بتائے گئے ہیں۔
سٹارک دنیا کے بہترین فاسٹ بولرز میں سے ایک ہیں اور خاص طور پر بڑے میچز میں زبردست پرفارمنس دینے کی وجہ سے مشہور ہیں، مچل سٹارک کی غیر موجودگی میں ممکنہ طور پر آسٹریلوی بولنگ لائن بظاہر کمزور ہو جائے گی۔
جوش ہیزل ووڈ
آسٹریلیا کے 3 بڑے فاسٹ بولرز میں سے ایک جوش ہیزل ووڈ بھی انجری کے سبب چیمپئنز ٹرافی میں نہیں کھیل سکیں گے۔
ان کی غیر موجودگی میں سٹیو سمتھ کو ایک نسبتاً کم تجربہ کار بولنگ اٹیک کی قیادت کرنی ہو گی۔
ہیزل ووڈ آسٹریلیا کے لیے ورلڈ کپ 2023 میں انتہائی اہم بولر ثابت ہوئے تھے، خاص طور پر سیمی فائنل اور فائنل میں ان کی بولنگ نے ٹیم کو جیت میں مدد دی تھی۔
مارکس سٹوئنس
آسٹریلیا کے اہم آل راؤنڈر مارکس سٹوئنس نے چیمپئنز ٹرافی سے قبل اچانک ون ڈے کرکٹ سے فوری ریٹائرمنٹ کا اعلان کیا۔
مارکوس سٹوئنس ٹی 20 کرکٹ پر فوکس کے لیے ون ڈے سے ریٹائر ہوئے، سٹوئنس چیمپئنز ٹرافی کے لیے آسٹریلوی سکواڈ کا حصہ تھے۔
مچل مارش
آسٹریلیا کے ایک اور اہم آل راؤنڈر مچل مارش بھی فٹنس مسائل کے باعث چیمپئنز ٹرافی سے باہر ہو گئے۔
اینرک نوکیا
جنوبی افریقی ٹیم نے گزشتہ ماہ آئی سی سی چیمپئنز ٹرافی کے سکواڈ کا اعلان کیا تھا جس کے بعد سکواڈ میں شامل فاسٹ بولر اینرک نوکیا بدقستمی سے کمر کی انجری کی وجہ سے ٹورنامنٹ سے باہر ہوئے۔
جیرالڈ کوئیٹزی
اینرک نوکیا کی انجری کی بعد جیرالڈ کوئیٹزی کو پاکستان میں ہونے والی سہ فریقی سیریز اور چیمپئنز ٹرافی کیلئے جنوبی افریقا کے سکواڈ میں شامل کیا گیا تھا۔
بدقستمی سے ٹریننگ کے دوران بولنگ کرتے ہوئے جیرالڈ کوئیٹزی کو اپنی ران میں کھچاؤ محسوس ہوا، فاسٹ بولر کا میڈیکل ٹیم نے معائنہ کیا جس میں ان کی انجری کو شدید قرار دیا گیا۔
جس کی وجہ سے کوئیٹزی آئی سی سی چیمپئنز ٹرافی کے لیے ٹیم کو دستیاب نہیں ہوں گے، نوکیا اور کوئیٹزی کی انجری کے بعد جنوبی افریقا کی فاسٹ بولنگ کا زیادہ تر دار و مدار فاسٹ بولر کگیسو ربادا پر ہی ہو گا۔
ایم اے غضنفر
افغانستان کے ابھرتے ہوئے سپنر ایم اے غضنفر بھی آئی سی سی چیمپئنز ٹرافی سے باہر ہو گئے۔
افغانستان کرکٹ بورڈ نے سپنر ایم اے غضنفر کے انجرڈ ہو کر ایونٹ سے باہر ہونے کی تصدیق کرتے ہوئے بتایا کہ غضنفر فریکچر کی وجہ سے 4 ماہ کے لیے کرکٹ سے باہر ہو گئے ہیں۔
جیکب بیتھل
انگلینڈ کے نوجوان آل راؤنڈر جیکب بیتھل بھی بدقسمتی سے اپنے پہلے بڑے آئی سی سی ٹورنامنٹ میں شرکت نہیں کر سکیں گے۔
جیکب بیتھل بھارت کے خلاف ون ڈے سیریز کے دوران ہیمسٹرنگ انجری کا شکار ہوئے تھے، وہ چیمپئنز ٹرافی کیلئے انگلش ٹیم کا حصہ تھے، جیکب کی جگہ چیمپئنز ٹرافی سکواڈ میں ٹام بینٹن کو شامل کر لیا گیا ہے۔
جیکب بیتھل نہ صرف بیٹنگ میں اہم کردار ادا کر سکتے تھے بلکہ ان کی سپن بولنگ بھی انگلش ٹیم کے لیے مددگار ثابت ہوسکتی تھی۔
بین سیئرز
نیوزی لینڈ کے فاسٹ بولر بین سیئرز بھی آئی سی سی چیمپئنز ٹرافی ٹورنامنٹ سے باہر ہوگئے ہیں۔
نیوزی لینڈ کرکٹ کے مطابق بین سیئرز ہیمسٹرنگ انجری کے باعث ٹورنامنٹ سے باہر ہوئے، انہیں بدھ کو کراچی میں ٹریننگ سیشن کے دوران انجری ہوئی، بین سیئرز کی جگہ جیکب ڈفی کو چیمپئنز ٹرافی کیلئے سکواڈ میں شامل کرلیا گیا ہے۔
چیمپئنز ٹرافی 2025 کئی اہم کھلاڑیوں کی غیر موجودگی کے سبب مزید دلچسپ ہو سکتی ہے کیونکہ ٹیموں کو متبادل کھلاڑیوں پر انحصار کرنا پڑے گا اور نئے چہرے بڑی سٹیج پر اپنی صلاحیتوں کا لوہا منوانے کے لیے میدان میں اتریں گے۔
