لاہور: (ویب ڈیسک) نیوزی لینڈ کے نوجوان اوپنر راچن رویندرا نے جنوبی افریقا کے خلاف آئی سی سی چیمپئنز ٹرافی کے سیمی فائنل میں شاندار سنچری سکور کر کے کئی ریکارڈز اپنے نام کر لیے۔
بدھ کو آئی سی سی چیمپئنز ٹرافی کے دوسرے سیمی فائنل میں لاہور کے قذافی سٹیڈیم میں نیوزی لینڈ نے پہلے کھیلتے ہوئے 6 وکٹوں کے نقصان پر 362 رنز بنائے۔
نیوزی لینڈ کی جانب سے راچن رویندرا نے 101 گیندوں پر 108 رنز کی شاندار اننگز کھیلی جبکہ کین ولیمسن نے 2 چھکوں اور 10 چوکوں کی مدد سے 102 رنز بنائے۔
363 رنز کے ہدف کے جواب میں جنوبی افریقا کی ٹیم 9 وکٹوں کے نقصان پر312 رنز بنا سکی۔
راچن رویندرا نے جنوبی افریقا کے خلاف سیمی فائنل میں سنچری سکور کرنے کے بعد منفرد ریکارڈ بھی قائم کر دیا، رویندرا کیریئر کی ابتدائی 5 ون ڈے سنچریاں آئی سی سی ایونٹس میں سکور کرنے والے دنیا کے پہلے بیٹر بن گئے۔
راچن نے 32 ون ڈے میچز میں 1196 رنز سکور کیے ہیں جس میں 5 سنچریاں شامل ہیں اور یہ تمام سنچریاں انہوں نے آئی سی سی ون ڈے ٹورنامنٹس میں بنائی ہیں۔
بائیں ہاتھ کے راچن نے 2023 کے ون ڈے ورلڈ کپ میں اپنے ڈیبیو ٹورنامنٹ کے دوران 3 سنچریاں بنائی تھیں جبکہ انہوں نے رواں چیمپئنز ٹرافی میں پہلے بنگلادیش اور پھر جنوبی افریقا کے خلاف سنچری سکور کی۔
راچن آئی سی سی ون ڈے ایونٹس میں تیز ترین 5 سنچریاں بنانے والے کھلاڑی بھی بن گئے ہیں، انہوں نے یہ کارنامہ صرف 13 اننگز میں حاصل کیا، اس کے علاوہ راچن رویندرا چیمپئنز ٹرافی کے ایک ہی ایڈیشن میں 2 سنچریاں بنانے والے نیوزی لینڈ کے پہلے بیٹر بھی بن گئے ہیں۔
