کراچی: (دنیا نیوز) قومی کرکٹ ٹیم ٹی 20 میچز کی سیریز کیلئے آج رات بنگلادیش روانہ ہوگی۔
سلمان علی آغا کی قیادت میں 15 رکنی پاکستان کرکٹ ٹیم آج شب دورہ بنگلا دیش کیلئے روانہ ہو گی، دورہ بنگلا دیش میں قومی ٹیم تین ٹی 20 انٹرنیشنل میچز کھیلے گی۔
پاکستان سکواڈ میں سلمان علی آغا ( کپتان)، ابرار احمد، احمد دانیال، فہیم اشرف، فخر زمان، حسن نواز، حسین طلعت، خوشدل شاہ، محمد عباس آفریدی، محمد حارث (وکٹ کیپر)، محمد نواز ،صاحبزادہ فرحان (وکٹ کیپر)، صائم ایوب، سلمان مرزا اور سفیان مقیم شامل ہیں، مائیک ہیسن ہیڈ کوچ، شین میکر موٹ فیلڈنگ، گرانٹ لوڈین سٹرینتھ اینڈ کنڈیشنگ کوچ اور سید چیمہ منیجر کی ذمہ داری ادا کریں گے۔
دورہ بنگلا دیش میں تین ٹی 20 انٹرنیشنل میچز 20، 22 اور 24 جولائی کو کھیلے جائیں گے جس کے بعد پاکستانی ٹیم ویسٹ انڈیز سے 3 میچز پر مشتمل ٹی 20 اور دن ڈے سیریز کھیلنے کیلئے امریکا پہنچے گی۔
فلوریڈا میں یکم تا 4 اگست دونوں ٹیمیں کے درمیان میچز کھیلے جائیں گے جبکہ دونوں ممالک کے درمیان ون ڈے سیریز 8 سے 12 اگست تک ٹرینیڈاڈ اینڈ ٹوباگو میں شیڈول ہے۔
دریں اثنا دورہ بنگلا دیش اور ویسٹ انڈیز کے لیے پاکستان کرکٹ سکواڈ کا تربیتی کیمپ پیر کی شب ختم ہو گیا، نیشنل بینک سٹیڈیم میں منعقدہ 6 روزہ کیمپ میں کھلاڑیوں نے بھرپور ٹریننگ کی۔
کیمپ میں دورہ بنگلا دیشں کے لیے 15 رکنی سکواڈ کے ساتھ 5 وائٹ بال کھلاڑی بابر اعظم، محمد رضوان، محمد وسیم جونیئر، نسیم شاہ اورشاہین شاہ آفریدی بھی شریک ہوئے۔
کیمپ کے آخری دن فلڈ لائٹ پریکٹس میچ کھیلا گیا، کوچنگ سٹاف نے سلمان علی آغا اور صائم الیون کے درمیان کھیلے جانے والے پریکٹس میچ میں کھلاڑیوں کی کارکردگی کا بغور جائزہ لیا۔
