دبئی: (ویب ڈیسک) اٹلی نے پہلی بار ٹی ٹوئنٹی ورلڈ کپ کے لیے کوالیفائی کرتے ہوئے آئندہ سال بھارت اور سری لنکا میں منعقد ہونے والے آئی سی سی مینز ٹی ٹوئنٹی ورلڈکپ 2026 میں جگہ بنالی۔
اٹلی نے یورپ کوالیفائر 2025 ایونٹ میں گرنزی اور سکاٹ لینڈ کے خلاف فتوحات کے ذریعے یہ کامیابی حاصل کی جس کے بعد وہ ایونٹ میں کو الیفائی کرنے والا 13واں ملک بن گیا ہے جبکہ نیدر لینڈز اس یونٹ میں کوالیفائی کرنے والا 14واں ملک ہے۔
آئی سی سی کے مطابق ٹی ٹوئنٹی ورلڈ کپ 2026 میں مجموعی طور پر 20 ٹیمیں شرکت کریں گی، میزبان بھارت اور سری لنکا کے علاوہ افغانستان، آسٹریلیا، بنگلادیش، انگلینڈ، جنوبی افریقا، ویسٹ انڈیز، امریکا اور نیوزی لینڈ گزشتہ ورلڈ کپ کے سپر ایٹ مرحلے میں پہنچنے کے باعث پہلے ہی کوالیفائی کر چکے ہیں۔
پاکستان، نیوزی لینڈ اور آئرلینڈ نے اپنی آئی سی سی ٹی ٹوئنٹی انٹرنیشنل رینکنگ کی بنیاد پر براہ راست ایونٹ میں کوالیفائی کیا ہے۔
اب ٹی ٹوئنٹی ورلڈ کپ 2026 کے لیے باقی 6 ٹیموں کا فیصلہ ریجنل کوالیفائرز کے ذریعے ہوگا جن میں افریقا سے 2، امریکا سے ایک اور ایشیا/ایسٹ ایشیا پیسیفک خطے سے 3 ٹیمیں شامل ہوں گی۔
