لاہور: (ویب ڈیسک) آل راؤنڈر شعیب ملک کے بعد پی سی سی کے ساتھ وابستہ مزید 2 مینٹورز ثقلین مشتاق اور وقار یونس بورڈ سے الگ ہوگئے جبکہ سابق کپتان سرفراز احمد اور مصباح الحق نیشنل کرکٹ اکیڈمی کیلئے خدمات سرانجام دے رہے ہیں۔
ڈائریکٹر ڈومیسٹک عبداللہ خرم نیازی نے کہا ہے کہ 15 رکنی کمیٹی نے 2 ماہ تک مسلسل مشاورت کے بعد ڈومیسٹک کرکٹ کا شیڈول اور نظام تشکیل دیا، اس میں تمام ریجنل صدور کو شامل کیا گیا ہے، تجاویز کی روشنی میں اہم فیصلے کیے گئے، تمام سٹیک ہولڈرز نے متفقہ طور پر اتفاق کیا کہ قائداعظم ٹرافی میں 6 ٹاپ ٹیمیں شامل رہیں گی جبکہ 2 ٹیمیں حنیف محمد ٹرافی سے کوالیفائی کرکے جگہ بنائیں گی۔
انہوں نے کہا ہے کہ چیمپئنز کپ کے اختتام اور قائد اعظم ٹرافی میں 18 سے 8 ٹیمیں کرنے والے پی سی بی عہدیداروں نے مضحکہ خیز دعویٰ کیا کہ موجودہ ڈومیسٹک اسٹرکچر میں کسی قسم کی تبدیلی نہیں ہوئی، پرانے نظام کو ہی برقرار رکھا گیا ہے۔
عبداللہ خرم نے کہا ہے کہ مثبت پیشرفت یہ ہے کہ آئندہ سیزن سے ڈومیسٹک کرکٹ میں نمایاں کارکردگی دکھانے والے کھلاڑیوں کو بھی سینٹرل کنٹریکٹ دیئے جائیں گے، اس کا مقصد نچلی سطح پر کرکٹ کو مزید مضبوط بنانا اور کھلاڑیوں کو مالی تحفظ فراہم کرنا ہے۔
ڈائریکٹر ڈومیسٹک کرکٹ کا کہنا تھا کہ کراچی بڑا نام ہے اور موجودہ سیزن میں اس کے پاس یہ موقع ہوگا کہ دونوں ٹیمیں قائداعظم ٹرافی میں جگہ بنا لیں۔
