ڈی جی خان: (دنیا نیوز) پنجاب پولیس کی کامیاب کارروائی میں اے ایس آئی اور کانسٹیبل کو شہید کرنے والے 3 ڈاکو ہلاک ہوگئے۔
ترجمان پنجاب پولیس کے مطابق ڈی جی خان میں تھانہ صدر تونسہ کی حدود میں سپر بند 2 کے مقام پر جرائم پیشہ عناصر کی اطلاع پر ناکہ بندی کی، 5 ملزمان کو ناکے پر روکنے کی کوشش پر فائرنگ کا تبادلہ ہوا، جوابی فائرنگ سے 3 ڈاکو انجام کو پہنچ گئے جبکہ 2 ملزمان اندھیرے کا فائدہ اٹھا کر فرار ہوگئے۔
حکام کا کہنا ہے کہ ملزمان کی فائرنگ سے پولیس موبائل کو نقصان پہنچا، جبکہ اہلکار محفوظ رہے۔
ترجمان پنجاب پولیس کے مطابق ہلاک ہونے والے ڈاکوؤں کی شناخت رحمت اللہ عرف رانجھا سنجرانی، فہد عرف فہدی اور آصف عرف حاجی سنجرانی کے ناموں سے ہوئی ہے، جبکہ مفرور ملزمان کی گرفتاری کیلئے سرچ آپریشن جاری ہے۔
یاد رہے کہ ملزمان نے گزشتہ روز اےایس آئی اور کانسٹیبل کو شہید کیا تھا۔
