قصور: (دنیا نیوز) تھانہ گنڈا سنگھ کی رہائشی بیرکس میں خود کشی کا معاملہ، ایس ایچ او سمیت 4 اہلکاروں کے خلاف مقدمہ درج کر کے ایس ایچ او کو گرفتار کر لیا گیا۔
تھانہ گنڈا سنگھ کی رہائشی بیرکس میں کاندو کھارہ چونیاں کے رہائشی شہری کی خودکشی پر ڈی پی او محمد عیسیٰ خاں نے نوٹس لے لیا۔
بتایا گیا ہے کہ علی الصبح ملازمین کی بیرکس سے حمید نامی مشکوک ملزم کی پھندا لگی پنکھے کے ساتھ لٹکی ہوئی لاش ملی۔
عبدالحمید کو گزشتہ شب تھانہ گنڈاسنگھ میں تعینات ASI محمد سلیم نے دوران گشت مشکوک جانتے ہوئے غیر قانونی طور پر حراست میں لیا۔
ملزم عبدالحمید نے دل برداشتہ ہو کر گلے میں صافہ ڈال کر پنکھے سے لٹک کر خود کشی کر لی۔
ڈی پی او قصور کی ہدایت پر ایس ایچ او محمد فاران، اے ایس آئی محمد سلیم، محرر شبیر اور نائب محرر ندیم الرحمان کے خلاف مقدمہ درج کر لیا گیا۔
ایس ایچ او محمد فاران کو حراست میں لے لیا گیا ہے جبکہ دیگر 3 اہلکار فرار ہیں۔
ڈی پی او محمد عیسیٰ خاں نے کہا کہ اختیارات سے تجاوز، غیر قانونی حراست اور مجرمانہ غفلت کسی صورت برداشت نہیں کی جائے گی۔
