لاہور: (محمد اشفاق) پولیس مقابلوں کیخلاف اور عدالتی انکوائری کیلئے لاہور ہائیکورٹ سے رجوع کر لیا گیا۔
درخواست مقامی شہری محمد ندیم کی جانب سے دائر کی گئی ہے، درخواست میں حکومت پنجاب، آئی جی پنجاب، ہوم ڈیپارٹمنٹ کو فریق بنایا گیا ہے۔
درخواست میں موقف اختیار کیا گیا ہے کہ پولیس مقابلے آئین اور عدالتی نظام کے خلاف ہیں، روزانہ کی بنیاد پر میڈیا میں پولیس مقابلے رپورٹ ہو رہے ہیں۔
ہر پولیس مقابلے میں ساتھی کی فائرنگ سے ملزمان کی ہلاکتوں کی خبریں آرہی ہیں، پولیس مقابلے شفاف ٹرائل کے آئینی حق کی سنگین خلاف ورزی ہیں۔
درخواست میں استدعا کی گئی کہ عدالت آج تک ہونے والے تمام پولیس مقابلوں کا ریکارڈ طلب کرے، عدالت تمام پولیس مقابلوں کی عدالتی انکوائری کے احکامات صادر کرے۔
عدالت کرائم کنٹرول ڈیپارٹمنٹ کو فوری طور پر پولیس مقابلے روکنے کے احکامات صادر کرے، عدالت جاری پولیس مقابلوں کو غیر قانونی اور غیر آئینی قرار دے۔
