ممبئی: (ویب ڈیسک) بالی ووڈ کے سپر سٹار سلمان خان ایسے پہلے اداکار نہیں جو قانون توڑنے کے باعث خبروں میں نظر آتے رہتے ہیں۔ آئیے آپ کو بتاتے ہیں کہ ایسے کون کون سے اداکار ہیں جو مبینہ قانون شکنی کی وجہ سے شہ سرخی بنے۔
حال ہی میں مبینہ قانون شکنی کا نشانہ بننے والے سلمان خان کے خلاف 1998ء میں جنگلی حیات کے تحفظ کے قانون کے تحت دو مقدمات درج کیے گئے تھے۔ ان پر اپنے ساتھی اداکاروں کے ساتھ نایاب ہرنوں کے شکار کا الزام تھا جس کے ثابت ہونے پر انہیں 5 سال قید کی سزا سنائی گئی ہے۔ اس کے علاوہ ان پر 2002ء میں باندرا کے علاقے میں ایک بیکری کے باہر فٹ پاتھ پر سوئے افراد پر نشے کی حالت میں گاڑی چڑھانے کا الزام بھی ہے۔
جتیندر
ماضی کے مقبول اداکار جتیندر کے خلاف اس برس جنوری میں ان کی ایک کزن نے جنسی حملے کی رپورٹ درج کروائی تھی۔
روینہ ٹنڈن
مارچ 2018ء میں ایک مندر کے حکام نے شکایت درج کروائی کہ اداکارہ روینہ ٹنڈں نے ایک اشتہار کی عکسبندی مندر کے اس علاقے میں کی ہے جہاں کیمرہ لے جانا ممنوع تھا۔
نواز الدین صدیقی
مارچ 2018ء میں نواز الدین صدیقی کی اہلیہ نے ان کے خلاف اپنی جاسوسی کرنے اور ٹیلی فون کالز کا ریکارڈ نکلوانے کا الزام عائد کیا تھا۔
سنجے دت
بالی ووڈ کے سنجو بابا غیر قانونی طور پر ہتھیار رکھنے کے جرم میں سزا کاٹ چکے ہیں۔
شاہ رخ خان
شاہ رخ خان کو بھی بھارت میں اپنی فلم رئیس کی شوٹنگ کے دوران کوٹا ریلوے سٹیشن کی املاک کو نقصان پہنچانے اور ہنگامہ آرائی کرنے کے الزام کا سامنا ہے۔ اس کے علاوہ 2002ء میں آئی پی ایل میچ کے دوران وانکھیڑے کرکٹ سٹیڈیم ممبئی میں سیکیورٹی حکام کے ساتھ بدتمیزی کے بعد اس سٹیڈیم میں پانچ سال تک ان کے داخلے پر پابندی بھی عائد کی گئی۔
سورج پنچولی
بالی ووڈ اداکار ادیتیہ پنچولی کے بیٹے سورج پنچولی پر اداکارہ جیا خان کی خود کشی میں اعانت کرنے اور اکسانے کا الزام ہے۔
شائنی آہوجا
اپنے کیرئیر کی ابتدا میں کامیابیاں سمیٹنے والے اس اداکار کو اپنی گھریلو ملازمہ سے زیادتی کرنے کے جرم میں جیل کی سزا بھگتنا پڑی۔
مدھر بھنڈارکر
ممبئی سے تعلق رکھنے والی ایک ماڈل نے ہدایت کار مدھر بھنڈارکر کے خلاف 2004ء میں زیادتی کا مقدمہ درج کروایا تاہم 2007ء میں اس ماڈل کو ہدایت کار کو قتل کرنے کی سازش کرنے کے جرم کا مرتکب پایا گیا۔
گووندا
بالی ووڈ کے ڈانسنگ ہیرو گووندا پر اپنی فلم ‘ منی ہے تو ہنی ہے‘ کے سیٹ پر مداح کو تھپڑ مارنے کے الزام کا سامنا تھا تاہم بھارتی سپریم کورٹ نے 2017ء میں ان پر درج کیس کو خارج کر دیا۔
