لاہور: (ویب ڈیسک) پاکستان کے معروف اداکار عدنان صدیقی صرف اداکاری میں ہی بہترین نہیں بلکہ ان کو موسیقی پر بھی کافی کمال حاصل ہے۔ ان کی بانسری پرفارمنس اتنی شاندار تھی کہ شائقین بےساختہ جھوم اٹھے.
عدنان صدیقی نے اپنے انسٹاگرام اکاؤنٹ پر ایک ویڈیو شیئر کی، جس میں وہ گلوکار عاطف اسلم کے مقبول گانے ’دل دیاں گلاں‘ کی دھن پر بانسری بجاتے نظر آئے۔ خیال رہے کہ عاطف اسلم نے یہ گانا کامیاب بالی وڈ فلم ’ٹائیگر زندہ ہے‘ کے لیے گایا تھا جو 2017 میں ریلیز ہوئی۔ عدنان صدیقی نے اس گانے کی دھن پر شاندار بانسری بجائی، جسے سن کر مداح جھوم اٹھے۔
عدنان صدیقی کی یہ ویڈیو چند ہی گھنٹوں میں سوشل میڈیا پر بھی خوب وائرل ہوگئی تھی۔ خیال رہے کہ ایسا پہلی بار نہیں ہوا جب عدنان صدیقی کی بانسری بجاتی ویڈیو سوشل میڈیا پر وائرل ہوئی ہو۔ اس سے قبل وہ گلوکار و اداکار بلال خان کے ساتھ بھی بانسری بجا چکے ہیں جس کی ویڈیو بلال خان نے اپنے انسٹاگرام اکاؤنٹ پر شیئر کی تھی۔
اس ویڈیو میں بلال خان گٹار بجاتے جبکہ عدنان صدیقی بانسری بجاتے نظر آئے تھے۔
