لاہور: (ویب ڈیسک) پاکستان کی معروف اور خوبرو اداکارہ اقراء عزیز نے کہا ہے کہ یاسر حسین کو مجھ سے پہلی نظر میں ہی محبت ہوگئی تھی لیکن مجھے تھوڑا وقت لگا۔
بی بی سی کے مطابق ٹی وی اداکارہ اقراء عزیز نے اپنی زندگی میں بہت سے نشیب و فراز دیکھے، انہوں نے اپنا بچپن کراچی کے علاقے برنس روڈ کے ایک چھوٹے سے فلیٹ میں گزارا۔
بی بی سی کو انٹرویو میں اقراء عزیز نے بتایا کہ یاسر اور میری پہلی ملاقات ٹورنٹو میں ایک ایوارڈ تقریب میں ہوئی۔ ہم نے کافی وقت ساتھ گزارا، یاسر کو مجھ سے پہلی نظر میں محبت ہو گئی تھی لیکن مجھے تھوڑا وقت لگا لیکن پھر مجھے ایک ماہ میں ہی اندازہ ہو گیا کہ یہ سب ہمیشہ کے لیے ہے۔
یاسر حسین کی کون سی باتیں بری لگتی ہیں کہ سوال کے جواب میں اقرا نے کہا کہ اگر یاسر کی کوئی چیزیں بری لگتیں تو وہ ان سے شادی ہی کیوں کرتیں۔ شوہر خواتین کی بہت عزت کرتے ہیں اور یہ بات انہیں سب سے زیادہ اچھی لگتی ہے۔
اپنے اہل خانہ کے بارے میں مزید بات کرتے ہوئے اقراء عزیز نے بتایا کہ ان کا تعلق ایک مڈل کلاس خاندان سے ہے، میں برنس روڈ پر رہتی تھی، میں نے ہمیشہ سے محلے داری دیکھی ہے۔ وہ ماحول دیکھا اور ایک فلیٹ دیکھا ہے، جس میں آپ ایک کمرے سے نکل کر فوراً ہی دوسرے کمرے میں آ جاتے ہیں، چھوٹا سا کچن اور ہر کمرے کے ساتھ باتھ روم بھی نہیں۔ میرا بیک گراؤنڈ کچھ ایسا ہی ہے لیکن میں نے ان حالات میں بھی اپنی والدہ کو بہت شکرگزار دیکھا۔
انہوں نے کہا کہ میں بچپن سے ہی امی کے دوپٹے لے کر اور ساڑھیاں باندھ کر بھارتی گانوں پر شیشے کے سامنے اداکاری کرتی تھی، تیار ہوتی تھی اور میک اپ کرتی تھی۔
اقرا عزیز نے کہا کہ وہ دسویں جماعت میں تھیں جب انھوں نے اس انڈسٹری میں ایک ٹی وی سی کے ذریعے قدم رکھا اور اس کے بعد انھوں نے یہ فیصلہ کر لیا کہ اب انھیں یہ ہی کرنا ہے۔
لیکن جب انھوں نے اداکاری میں اپنا کرئیر بنانے کا فیصلہ کیا اور اس بارے میں اپنی والدہ کو آگاہ کیا تو ان کی والدہ نے کہا کہ پڑھائی نہیں چھوڑنی۔
