ممبئی: (ویب ڈیسک) معروف بالی وڈ اداکارہ امیشا پٹیل فراڈ کے مقدمہ میں عدالت سے مسلسل غیر حاضر ہیں، اداکارہ کے خلاف فراڈ اور چیک باؤنس ہونے کا مقدمہ درج ہے۔
بھارتی میڈیا کے مطابق فلم پروڈیوسر اجے کمار کی جانب سے درج کروائے گئے مقدمے میں امیشا پٹیل کے بزنس پارٹنر کرونال کو بھی نامزد کیا گیا ہے۔
اداکارہ کے خلاف درج مقدمے میں لکھا ہے کہ امیشا پٹیل اور ان کے پارٹنر نے دیسی میجک کے نام سے ایک فلم بنانے کیلئے پروڈیوسر سے اڑھائی کروڑ روپے لیے اور سود کے ساتھ رقم لوٹانے کی یقین دہانی کروائی۔
فلم کی شوٹنگ کا آغاز سال 2013ء میں ہونا تھا لیکن وہ 2023ء تک ریلیز نہیں ہوئی، پروڈیوسر نے اداکارہ اور ان کے پارٹنر سے رقم کی واپسی کا مطالبہ کیا، اجے کمار کو اداکارہ اور ان کے پارٹنر کی طرف سے رقم کے چیک دیے گئے لیکن وہ دونوں چیک باؤنس ہوگئے۔
خیال رہے کہ فلم پروڈیوسر اجے کمار کی شکایت پر عدالت اداکارہ اور ان کے بزنس پارٹنر کو بارہا طلب کر چکی ہے مگر وہ حاضر نہیں ہوئے، مقدمے کی اگلی سماعت 15 اپریل کو کی جائے گی۔
