لاہور (ویب ڈیسک) پاکستانی نژاد برطانوی گلوکار زین ملک نے پاکستانی میوزک بینڈ ’اور‘ کے نوجوان گلوکاروں کے ساتھ کام کرنے پر خوشی کا اظہار کیا ہے۔
رپورٹ کے مطابق12 جنوری کو گانا ’تو ہے کہاں‘ کا اپڈیٹڈ ورژن ریلیز ہوا جس میں برطانوی گلوکار زین ملک نے بھی پاکستان کےمیوزک بینڈ ’اور‘ کے نوجوان گلوکاروں کے ساتھ اُردو زبان میں گائیکی کی۔زین ملک کی آواز میں اُردو زبان میں گانا سُن کر اُن کے لاکھوں مداحوں خوشی سے نہال ہوئے اور سوشل میڈیا پر گانے کی ویڈیو کلپس شیئر کرکے اپنی خوشی کا اظہار کرتے رہے۔
برطانوی گلوکار زین ملک کا اپنے ایک انٹرویو میں پاکستانی گلوکاروں کے ساتھ کام کرنے کے تجربے پر بات کرتے ہوئے کہنا تھا کہ جب پاکستانی میوزک بینڈ ’اور‘ نے گانا ’تو ہے کہاں‘ میں کام کرنے کے لیے مجھ سے رابطہ کیا تو مجھے بہت زیادہ خوشی ہوئی کیونکہ مجھے یہ گانا بہت پسند ہے۔
برطانوی گلوکار نے گانے کی مقبولیت کی اُمید ظاہر کرتے ہوئے کہا کہ مجھے اُمید ہے کہ میرے تمام مداحوں کو اُردو زبان میں میرا یہ گانا پسند آئے گا۔
