گلگت بلتستان: (دنیا نیوز) ٹیلنٹ کسی کی میراث نہیں، جسے ننھے وی لاگر محمد شیراز نے سچ ثابت کر دکھایا، 6 سالہ شیراز پہلی جماعت کا طالب علم ہے مگر اپنے وی لاگز میں اعتماد اور معصوم اداؤں کے باعث ہر ایک کی توجہ کا باعث بن چکا ہے۔
معصوم انداز، پراعتماد لب و لہجہ، گلابی اردو، مسکراتا چہرہ لوگوں کو شیراز کی طرف راغب کرتاہے، ننھے وی لاگر محمد شیراز کا تعلق سیاچن کے نواحی گاؤں غورسے سے ہے۔
شیراز اپنی ہر ویڈیو میں پر اعتماد، منفرد اور اس خوبصورت انداز سے اپنی زندگی کے تجربے کو بیان کرتا ہے کہ دیکھنے والے دنگ رہ جاتے ہیں کہ اتنی کم عمری میں بھی یوں ہر واقعہ بیان کیا جا سکتا ہے، یہی وجہ ہے کہ ویڈیو اپ لوڈ ہوتے ہی لاکھوں لوگ اسے دیکھتے ہیں۔
بچے تو ویسے ہی معصوم ہوتے ہیں ان کی ہر ادا میں معصومیت جھلکتی ہے مگر شیراز سپیشل ٹیلنٹ ہے جس کا ثبوت اس کی بنائی گئی ہر ویڈیوز ہیں، کسی ایئر پورٹ کا تعارف کروانا ہو یا کسی علاقے، ہوٹل یا کسی مقام کا شیراز سے بہتر کوئی نہیں جانتا۔
شیراز اپنی کمسن بہن کے ساتھ ادائیں کرتا یوں اُس علاقے کی تفصیلات بتاتا ہے کہ ویڈیو دیکھنے والا اپنے آپ کو اس کا حصہ محسوس کرنے لگتا ہے۔
کم مگر بلا کا اعتماد، شیراز کی بنائی گئی ویڈیو کو حقیقت کے قریب تر کرتا ہے، چھوٹا ہو یا بڑا سب سے کس انداز میں گفتگو کرنا ہے شیراز خوب جانتا ہے، وہ جہاز میں اپنے پہلے سفر کی داستان اس خوبصورت انداز سے بیان کرتا ہے کہ دیکھنے والے بھی تعریف کرنے پر مجبور ہو جاتے ہیں۔
شیراز کو دیکھ کر یہ ثابت ہوتا ہے کہ ٹیلنٹ کسی کی میراث نہیں، اس کیلئے عمر کی بھی کوئی قید نہیں، وہ اس انداز سے ویڈیو بناتا ہے کہ ہر ویڈیو میں اُس کے علاقے کی جھلک بھی دکھائی دیتی ہے۔
اس کی ویڈیو کا ہی کمال تھا کہ پاک فوج بھی اس کی جانب کھچی چلی آئی، اس کے گاؤں میں نیٹ اور دیگر مسائل پر ویڈیو سوشل میڈیا پر وائرل ہوتی ہے تو پاک فوج اس کی مدد کو پہنچتی ہے، اس کی حوصلہ افزائی بھی کی جاتی ہے اور جدید آلات بھی مہیا کئے جاتے ہیں، شیراز اپنی ایک ویڈیو میں فوجی افسر کے اپنے گھر آنے کی داستان بھی سناتا ہے۔
شیراز کی بہن مسکان وی لاگز بنانے میں اُس کی پوری مدد کرتی ہے، اس کے چینل کو چند روز میں 92 ہزار سے زائد لوگ سبسکرائب کر چکے ہیں۔
ننھا وی لاگر شیراز صرف کامیاب یوٹیوبر ہی نہیں بلکہ اپنے پسماندہ علاقے کی تعمیرو ترقی میں بھی اہم کردار ادا کر رہا ہے، یہی وجہ ہے وہ اپنے خواب کو حقیقت میں تبدیل کرنے میں کامیاب رہا۔
