لاہور : (دنیا نیوز) فلم اور ٹیلی ویژن کے سینئر اداکار خالد بٹ مرحوم کی آج پہلی برسی منائی جا رہی ہے۔
اداکار خالد بٹ21 ستمبر 1946ء کو پیدا ہوئے، وہ 1970ء میں اپنے آبائی شہر ملتان سے لاہور منتقل ہو گئے اور بطور ایسوسی ایٹ ڈائریکٹر اپنے فنی کیریئر کا آغاز کیا، انہوں نے فلموں سمیت تھیٹر میں بھی خوب کام کیا لیکن ٹی وی ڈراموں میں اداکاری نے انہیں شہرت کی بلندیوں پر پہنچایا۔
1978ء میں انہیں بطور اداکار پی ٹی وی پر اپنی پہلی پرفارمنس دکھانے کا موقع ملا، انہوں نے لنڈا بازار، لال عشق ، جیون نگر، پس دیوار، دوسرا آسمان، بوٹا فرام ٹوبہ ٹیک سنگھ اور دل دروازے سمیت کئی ڈراموں میں لازوال کردار نبھائے۔
خالد بٹ کو 2016ء میں ان کی فنی خدمات کے اعتراف میں پرائیڈ آف پرفارمنس ایوارڈ سے نوازا گیا، سینئر اداکار طویل علالت کے بعد 11 جنوری 2024ء کو اپنے خالق حقیقی سے جا ملے۔
