کراچی: (ویب ڈیسک) معروف اداکارہ سعدیہ امام نے ایک ٹاک شو میں اُشنا شاہ کی اداکاری پر اپنے تحفظات کا اظہار کر دیا۔
معروف اداکارہ سعدیہ امام نے مشہور ڈرامہ ’’اے عشقِ جنون‘‘ میں اُشنا شاہ کے کردار پر گفتگو کرتے ہوئے کہا کہ یہ سین زیادہ بہتر طریقے سے کیا جا سکتا تھا، مجھے اُشنا شاہ کا یہ سین پسند نہیں آیا، اسے زیادہ بہتر اور نرمی سے کیا جا سکتا تھا۔
انہوں نے کہا کہ اور ہاں وہ اتنے سارے کپڑے کہاں سے لے کر آ رہی ہیں؟ کچھ چیزیں سمجھ نہیں آ رہیں، میں نے انہیں ایک ڈرامے میں شاندار اداکاری کرتے دیکھا تھا لیکن اب سمجھ نہیں آ رہا کہ کیا ہو رہا ہے۔
سعدیہ امام نے مزید کہا کہ میں اُشنا کی ماضی کی اداکاری کی معترف رہی ہوں وہ اچھی اداکارہ ہیں، بس شاید اب کچھ بہتر کرنے کی ضرورت ہے۔
اداکارہ سعدیہ امام کے ان خیالات پر بھی مداحوں کا ملا جلا ردعمل دیکھنے میں آیا ہے، کچھ ناظرین نے ان کی بات سے اتفاق کرتے ہوئے اُشنا شاہ کی اداکاری کو غیر فطری قرار دیا جبکہ کچھ نے اس تنقید کو غیر ضروری کہا۔
