لاہور: (دنیا نیوز) اردو ادب کے معروف شاعر اور مزاح نگار سید ضمیر جعفری کو دنیا سے رخصت ہوئے 26 برس بیت گئے۔
سید ضمیر جعفری یکم جنوری 1916ء کو ضلع جہلم میں پیدا ہوئے، ان کا اصل نام سید ضمیر حسین تھا، تعلیم مکمل کرنے کے بعد انہوں نے بطور صحافی عملی زندگی کا آغاز کیا، بعدازاں فوج میں شمولیت اختیار کر لی اور میجر کے رینک پر پہنچ کر ریٹائرڈ ہوئے۔
ان کا شمار اردو کے اہم مزاح گو شاعروں میں ہوتا ہے، ان کے شعری مجموعہ جات میں ’’ضمیر ضرافت‘‘، ’’نشاط تماشا‘‘، ’’کارزار‘‘، ’’لہو ترنگ‘‘ ’’ما فی الضمیر‘‘، ’’مسدس بے حالی‘‘، ’’ضمیریات‘‘، ’’قریہ جاں‘‘ قابل ذکر ہیں، ان کی کئی نثر نگاری پر مشتمل کتابیں بھی شائع ہوئیں۔
1984ء میں انہیں حکومت پاکستان نے صدارتی تمغہ برائے حسن کارکردگی سے نوازا۔
سید ضمیر جعفری کا 12 مئی 1999ء کو نیویارک میں انتقال ہوا، وہ راولپنڈی کے قبرستان میں آسودہ خاک ہیں۔
