کراچی: (ویب ڈیسک) پاکستانی اداکار و میزبان احسن خان نے زور دیا ہے کہ خواتین مردوں پر انحصار کرنے کے بجائے خود مختار بنیں۔
حال ہی میں اداکار نے نجی فیشن میگزین کے پوڈکاسٹ میں بطور مہمان شرکت کی، جہاں انہوں نے مختلف امور پر اپنے خیالات کا اظہار کیا۔
انہوں نے رشتہ ازدواج میں منسلک ہونے والے نوجوانوں جوڑوں کو مشورہ دیتے ہوئے کہا کہ اگر کوئی جوڑا کم عمر میں شادی کے بندھن میں بندھتا ہے اور دونوں ساتھ ساتھ بڑے ہوتے ہیں ضروری ہے کہ دونوں میں مطابقت ہو، ایسا نہ ہو کہ ایک آگے نکل جائے اور ایک پیچھے رہ جائے۔
اداکار احسن نے کہا کہ اکثر اس طرح کے رشتے میں خواتین تعلیم، کیریئر کے حوالے سے پیچھے رہ جاتی ہیں ایسا نہیں ہونا چاہیے۔ یہی ہمارے والدین کے وقتوں میں بھی ہوا کرتا تھا، یہی وجہ ہے کہ ہمارے سماج میں لڑکیوں کے لیے زیادہ مسائل ہوتے ہیں، کیونکہ انہیں شادی کے بعد دوسرے گھر جانا ہوتا ہے، جہاں کا ماحول بالکل مختلف ہوتا ہے۔
اداکار نے کہا کہ میں آج کل کے والدین اپنے بیٹوں کی درست تربیت نہیں کرتے، ان میں سرمایہ کاری نہیں کرتے، ان کی تربیت پر توجہ نہیں دی جاتی، خواتین کو خود مختار بنانے کا مطلب یہ نہیں ہے کہ وہ اپنے مذہب سے، ثقافت اور خاندانی اقدار سے دور ہو جائے گی بلکہ ایسی عورت جسے سب چیزوں کا علم ہوگا وہ زیادہ بہتر طریقے سے معاملات سنبھال سکے گی۔
