ممبئی: (ویب ڈیسک) بالی ووڈ کی مشہور ترین فلم ’’تھری ایڈیٹس‘‘ کے معروف اداکار اچیوٹ پوٹدار 91 برس کی عمر میں چل بسے۔
یاد رہے کہ اداکار اچیوٹ پوٹدار نے سال 2009 میں ریلیز ہونے والی فلم تھری ایڈیٹس میں سخت مزاج پروفیسر کا کردار نبھایا تھا جس میں ان کے مشہور ڈائیلاگ ’ارے کہنا کیا چاہتے ہو؟‘ نے مداحوں کو خوب محظوظ کیا تھا، صرف یہی نہیں بلکہ اس فلمی ڈائیلاگ پر بے تحاشا میمز بھی بنائی گئی تھیں۔
بھارتی میڈیا کے مطابق اچیوٹ پوٹدار کو طبی مسائل کے بعد جیوپیٹر ہسپتال میں داخل کرایا گیا تھا، لیکن وہ صحتیاب نہ ہو سکے، ان کی آخری رسومات ممبئی میں ادا کی جائیں گی۔
اداکار کی موت کی درست وجہ ظاہر نہیں کی گئی، تاہم عمر رسیدہ ہونے سے جُڑی پیچیدگیوں کو ممکنہ سبب قرار دیا جا رہا ہے۔
معروف اداکار اچیوٹ پوٹدار نے کئی دہائیوں پر محیط اپنے شاندار کیریئر کے دوران ہندی اور مراٹھی سینما میں 125 سے زائد فلموں میں کام کیا، ان کی نمایاں فلموں میں ’’آکروش‘‘، ’’اردھ ستیہ‘‘، ’’تیزاب‘‘، ’’راجو بن گیا جینٹل مین‘‘، ’’دل والے‘‘ ، ’’رنگیلا‘‘ ، ’’مہرتی دند‘‘، ’’یشونت‘‘، ’’عشق‘‘، ’’واستو‘‘، ’’آ اب لوٹ چلیں‘‘، ’’ہم ساتھ ساتھ ہیں‘‘ اور ’’پرندہ‘‘ شامل ہیں۔
تاہم بلاک بسٹر فلم ’’3 ایڈیٹس‘‘ میں ان کا کردار ان کی خاص پہچان بنا جو آج بھی مداحوں کو یاد ہے۔
فلمی دنیا کے علاوہ پوٹدار نے بھارتی ٹیلی وژن پر بھی اپنی گہری چھاپ چھوڑی، واگلے کی دنیا اور بھارت کی کھوج جیسے مقبول ڈراموں میں ان کی اداکاری کو بے حد سراہا گیا۔
ان کے انتقال کی خبر سے ساتھی فنکاروں اور مداحوں میں غم کی لہر دوڑ گئی ہے، انہیں ایک عاجز، محنتی اور مخلص فنکار کے طور پر یاد کیا جا رہا ہے، جنہوں نے اپنے نرم لیکن مؤثر انداز سے فلمی دنیا پر ایک دیرپا اثر چھوڑا۔
