ممبئی: (ویب ڈیسک) 72 ملین ڈالر فراڈ کے الزام پر شلپا شیٹی کے شوہر راج کندرا نے خاموشی توڑ دی۔
بالی ووڈ اداکارہ شلپا شیٹی کے شوہر اور معروف بھارتی بزنس مین راج کندرا نے اپنے خلاف لگنے والے 6.04 ارب روپے (تقریباً 72 ملین ڈالر) کے فراڈ کے الزامات کی تردید کر دی ہے۔
نئی دہلی میں اپنی پنجابی فلم ’مہر‘ کی پروموشن کے دوران میڈیا سے بات کرتے ہوئے راج کندرا کا کہنا تھا کہ انہوں نے کوئی غلط کام نہیں کیا، انہوں نے کہا ہم نے اب تک کچھ نہیں کہا کیونکہ ہمیں معلوم ہے کہ ہم بے قصور ہیں، جلد سچ سامنے آ جائے گا۔
یہ الزامات 60 سالہ بزنس مین دیپک کوٹھاری کی جانب سے سامنے آئے ہیں، جن کا دعویٰ ہے کہ انہیں ایک سرمایہ کاری کے معاہدے کے ذریعے دھوکہ دیا گیا۔
یہ معاہدہ 2015 سے 2023 کے دوران کیا گیا تھا، جس میں راج کندرا اور شلپا شیٹی فریق تھے۔
دیپک کوٹھاری کے مطابق، 2015 میں انہیں ’بیسٹ ڈیل ٹی وی پرائیویٹ لمیٹڈ‘ کو، جس کے شریک مالک راج کندرا اور شلپا شیٹی تھے، 12 فیصد سالانہ منافع پر 7.5 ارب بھارتی روپے قرض دینے پر آمادہ کیا گیا تھا۔
دیپک کا کہنا ہے کہ انہوں نے راج کندرا کو مجموعی طور پر 6.04 ارب روپے منتقل کیے، مگر بعد میں اس قرض کو ایک سرمایہ کاری میں تبدیل کر دیا گیا۔
ان کے مطابق شلپا شیٹی نے اپریل 2016 میں اس معاہدے کے لیے ذاتی ضمانت بھی دی تھی لیکن ستمبر 2016 میں انہوں نے کمپنی کے ڈائریکٹر کے عہدے سے استعفیٰ دے دیا۔
دیپک کا یہ بھی کہنا ہے کہ اُس وقت کمپنی کے خلاف دیوالیہ ہونے کے مقدمات زیرِ سماعت تھے، جو مبینہ طور پر ان سے چھپائے گئے۔
