کراچی: (ویب ڈیسک) 2025 پاکستان شوبز انڈسٹری کے فنکاروں کے لیے بھی خوشیوں اور نئی شروعات کا پیغام لے کر آیا تھا۔
ایک زمانہ وہ بھی تھا جب فنکاروں کی شادیوں میں ساتھی فنکار اور صحافی بڑی تعداد میں شریک ہوتے تھے لیکن اب وہ دور نہیں رہا، سوشل میڈیا کے ذریعے تصاویر پوسٹ کر کے شادیوں کی اطلاع دی جاتی ہے، رواں برس کئی سٹارز کو جیون ساتھی ملے اورانہوں نے خوشیوں کے گیت گائے۔
فلموں اور ڈراموں میں اپنی اداکاری کے جوہر دکھانے والے منجھے ہوئے اداکار گوہر رشید اور اداکارہ کبریٰ خان نے جنوری 2025 میں اپنی شادی کی تصدیق کی جبکہ فروری 2025 میں دونوں نے سعودی عرب کے مقدس شہر مکہ مکرمہ میں نکاح کیا جس کی تصاویر اور ویڈیوز سوشل میڈیا پر وائرل ہوئیں، ان لمحات میں دونوں کے درمیان محبت اور کیمسٹری نمایاں نظر آئی۔
پاکستان شوبز انڈسٹری کے دو مقبول نام اداکارہ ماورا حسین اور اداکار امیر گیلانی بھی رواں برس رشتۂ ازدواج میں منسلک ہوئے، ماورا حسین نے انسٹاگرام پر اپنی شادی کی خوبصورت تصاویر شیئر کیں جو لاہور کے تاریخی شاہی قلعے میں لی گئی تھیں۔
تصاویر کے کیپشن میں ماورا نے لکھا اور تمام افراتفری کے درمیان میں نے آپ کو پالیا جبکہ شادی کی تاریخ کے ساتھ ماورا امیر ہوگئی، کا ہیش ٹیگ بھی استعمال کیا، یہ بات بھی قابلِ ذکر ہے کہ ماورا حسین نے پاکستانی فلموں کے ساتھ ساتھ بالی وڈ میں بھی کام کیا ہے۔
پاکستان شوبز انڈسٹری کی خوبرو اداکارہ نیلم منیر کی شادی بھی رواں برس ملک سے باہر ہوئی، نیلم منیر کے شوہر کا نام محمد راشد ہے اور یہ شادی پسند کی شادی بتائی جاتی ہے۔
شوبز انڈسٹری میں تیزی سے کامیابی حاصل کرنے والے اور عالمی ایوارڈ یافتہ اداکار احمد علی اکبر بھی شادی کے بندھن میں بندھ گئے، احمد علی اکبر اپنی سنجیدہ طبیعت اور نجی زندگی کو میڈیا سے دور رکھنے کے لیے جانے جاتے ہیں، 2025 میں ان کی سوشل میڈیا کانٹینٹ کریئیٹر اور وکیل ماہم بتول سے شادی کی خبریں سامنے آئیں جس نے مداحوں کو خوشگوار حیرت میں مبتلا کر دیا۔
علاوہ ازیں رواں برس اداکار و ماڈل عمر شہزاد، گلوکارہ آئمہ بیگ اور مقبول ٹک ٹاکر ربیکا خان کی شادیوں کے چرچے بھی سوشل میڈیا اور شوبز حلقوں میں موضوعِ بحث رہے، یوں 2025 پاکستان شوبز انڈسٹری کے لیے کامیابیوں کے ساتھ ساتھ خوشیوں، نئی زندگیوں اور یادگار لمحات کا سال ثابت ہوا۔
