پشاور:(ویب ڈیسک) خیبر پختونخوا پولیس نے اپنے آفیشل ٹوئٹر اکاؤنٹ سے وزیراعظم، پیپلز پارٹی اور جے یو آئی کے وفاقی وزرا کو ان فالو کرنے کی خبروں کو جعلی قرار دے دیا۔
سماجی رابطے کی ویب سائٹ ٹوئٹر پر کے پی پولیس کی جانب سے پوسٹ شیئر کی گئی جس میں بتایا گیا کہ سوشل میڈیا پر چلنے والی فیک نیوز کہ خیبرپختونخوا پولیس کے آفیشل ٹوئٹر اکاؤنٹ سے وزیراعظم، پیپلز پارٹی اور جے یو آئی کے تمام وفاقی وزراء کو unfollow کیا ہے کی سختی سے تردید کرتی ہے۔
سوشل میڈیا پر چلنے والی فیک نیوز (جھوٹی خبر) کہ "خیبرپختونخوا پولیس کے آفیشل ٹوئیٹر اکاؤنٹ سے وزیراعظم، پیپلز پارٹی اور جے یو آئی کے تمام وفاقی وزراء کو unfollow کیا ہے" کی سختی سے تردید کرتی ہے. pic.twitter.com/oqLLcdnAVN
— KP Police (@KP_Police1) July 7, 2022
خیبر پختونخوا پولیس کی جانب سے پوسٹ میں لکھا گیا کہ یہ بات وضاحت سے بتائی جاتی ہے کہ کے پی پولیس نے گزشتہ کئی سالوں سے کسی بھی آئینی ادارے یا عہدیدار کے ٹوئٹر اکاؤنٹ کو ان فالو نہیں کیا اور یہ جو جھوٹی خبر پھیلائی گئی ہے سراسر غلط اور حقائق کے منافی ہے۔
خیبر پختونخوا پولیس ایک غیر سیاسی اور پروفیشنل ادارہ ہے جو دہشتگردوں اور جرائم پیشہ افراد کے خلاف برسر پیکار ہے، کے پی پولیس کی تاریخ بیش بہا کامیابیوں اور لازوال قربانیوں سے بھری پڑی ہے۔
ٹویٹ میں لکھا گیا کہ چند مفاد پرست افراد کی جانب سے پھیلائی گئی فیک نیوز سے خیبر پختونخوا پولیس کی ساکھ کو نقصان پہنچانے کی کوشش کی گئی ہے، کے پی پولیس ایسی فیک نیوز پھیلانے والے افراد کے خلاف قانونی کارروائی عمل میں لا رہی ہے۔
