اسلام آباد: (دنیا نیوز) حکومتِ پاکستان نے ملک بھر میں جاری سرویکل کینسر ویکسینیشن مہم کے حوالے سے سیاسی و مذہبی جماعتوں کو اعتماد میں لینے کا فیصلہ کر لیا ہے۔
وزارت صحت نے مہم کے خلاف جاری منفی پروپیگنڈے کے تناظر میں سیاسی اور مذہبی جماعتوں کو اعتماد میں لینے کا فیصلہ کیا۔
ذرائع نے بتایا کہ وزارت صحت جلد ہی مختلف سیاسی و مذہبی جماعتوں سے رابطے کرے گی تاکہ انہیں ایچ پی وی ویکسین کی افادیت اور مہم کے مقاصد پر قائل کیا جا سکے، سیاسی و مذہبی جماعتوں سے ایچ پی وی ویکسینیشن مہم کی حمایت کی اپیل کی جائے گی، ساتھ ہی ان سے درخواست کی جائے گی کہ وہ مہم کے حق میں بیانات جاری کریں۔
اس کے علاوہ مذہبی و سیاسی شخصیات کو کہا جائے گا کہ وہ سوشل میڈیا پر وڈیو پیغامات جاری کر کے عوام میں آگاہی پھیلائیں۔
حکومتی وفد مختلف مکاتبِ فکر کے جید علمائے کرام سے بھی ملاقاتیں کرے گا تاکہ عوامی سطح پر ویکسین سے متعلق پائے جانے والے خدشات کو دور کیا جا سکے۔
ذرائع کے مطابق وزارت صحت خواتین پارلیمنٹیرینز کو ایچ پی وی ویکسین کے بارے میں بریفنگ دے چکی ہے اور اب سیاسی و مذہبی جماعتوں کو باضابطہ خطوط بھی لکھے جائیں گے۔
واضح رہے کہ پاکستان میں 15 ستمبر کو پہلی قومی سرویکل کینسر بچاؤ مہم کا آغاز کیا گیا تھا، جو 27 ستمبر تک پنجاب، سندھ، اسلام آباد اور آزاد کشمیر میں جاری رہے گی، وفاقی اور صوبائی حکومتوں سمیت آزاد کشمیر کو ویکسین اور سرنجز کی فراہمی پہلے ہی مکمل کی جا چکی ہے۔
