اسلام آباد: (دنیا نیوز) خسرہ، روبیلا اور پولیو سے بچاؤ کی قومی ویکسینیشن مہم کا آج سے باقاعدہ آغاز ہوگیا، مہم 29 نومبر سے جاری رہے گی۔
نیشنل ای او سی کے مطابق مہم کے دوران 3 کروڑ 54 لاکھ بچوں کو خسرہ اور روبیلا سے بچاؤ کی ویکسین دی جائے گی۔
ملک بھر کے 90 ہائی رسک اضلاع میں رواں ہفتے 2 کروڑ 33 لاکھ بچوں کو پولیو کے قطرے پلائے جائیں گے، 6 ماہ سے 5 سال تک کے تمام بچوں کو خسرہ اورروبیلا سے بچاؤ کی ویکسینیشن دی جائے گی، ویکسین سرکاری صحت کے مراکز، سکولوں، مدارس اور عارضی ویکسینیشن مراکز پر فراہم کی جائے گی۔
حکام کا کہنا ہے کہ خسرہ، روبیلا کی قومی مہم کے دوران پنجاب میں تقریباً 68 لاکھ بچوں کو پولیو کے قطرے پلائے جائیں گے،بلوچستان میں 22 لاکھ 46 ہزار، سندھ میں 84 لاکھ سے زائد اور خیبر پختونخوا میں 52 لاکھ 46 ہزار بچوں کو پولیو کے قطرے پلائے جائیں گے، اسی طرح مہم کے دوران گلگت بلتستان میں ایک لاکھ 36 ہزار، اسلام آباد میں 4 لاکھ 61 ہزار بچوں کو پولیو کے قطرے پلائے جائیں گے۔
نیشنل ای او سی نے کہا ہے کہ پنجاب میں 1 کروڑ 73 لاکھ، سندھ میں 82 لاکھ 63 ہزار، خیبر پختونخوا میں 59 لاکھ 88 ہزار، بلوچستان میں 27 لاکھ 30 ہزار، آزاد جموں و کشمیر میں 6 لاکھ 24 ہزار، گلگت بلتستان میں 2 لاکھ 46 ہزار جبکہ اسلام آباد میں 2 لاکھ 25 ہزار سے زائد بچوں کو خسرہ اور روبیلا سے بچاؤ کی ویکسین دی جائے گی۔
حکام نے والدین سے اپیل کی ہے کہ اپنے بچوں کی ویکسینیشن کو یقینی بنائیں، انہیں خسرہ، روبیلا اور پولیو سے محفوظ بنائیں۔
