میانوالی: (روزنامہ دنیا) سول جج وجوڈیشل مجسٹریٹ نے دھوکہ دہی اور فراڈ کے مقدمہ میں تحریک انصاف کے لیہ سے رکن قومی اسمبلی عبد المجید خان کو اشتہاری قرار دے کر ڈپٹی کمشنر لیہ کو ان کی جائیداد قرق کرنے کا تحریری حکم جاری کردیا۔
منصور آفاق کی مدعیت میں درج یہ مقدمہ 2017 سے زیر سماعت ہے اور اس میں رکن قومی اسمبلی کے بڑے بھائی اور میانوالی کے معروف معالج حکیم طارق عبد اللہ بھی شامل ہیں۔
واضح رہے کہ جنرل الیکشن کے موقع پر پر لیہ شہر کے حلقے این اے 187 سے پی ٹی آئی کے امیدوار عبد المجید خان 93903 ووٹ لے کر کامیاب ہوئے تھے۔ انہوں نے بالٹی کے انتخابی نشان پر انتخاب لڑنے والے آزاد امیدوار سردار بہادر احمد خان کو شکست دی تھی۔ سردار بہادر 88225 ووٹ حاصل کرسکے تھے جبکہ ن لیگی امیدوار اس حلقے کے انتخاب میں 64344 ووٹ حاصل کر پائے تھے۔
