اسلام آباد: (دنیا نیوز) وزیراعظم عمران خان کی زیرِصدارت وفاقی کابینہ کا اجلاس آج ہو گا، کابینہ "لاہور نئی دہلی بس سروس" معاہدے میں توسیع سمیت 20 نکاتی ایجنڈے پر غور کرے گی۔
وزیرِاعظم ہاؤس میں ہونے والے اجلاس میں ملک کی سیاسی اور معاشی صورتحال کا جائزہ لیا جائے گا۔ وزیراعظم عمران خان ملائیشیا کے وزیراعظم مہاتیر محمد کے دورہ پاکستان پر کابینہ کو اعتماد میں لیں گے۔ وزیر خزانہ اسد عمر ملائیشیا کے ساتھ ہونے والے معاہدوں پر بریف کریں گے۔
کابینہ "لاہور نئی دہلی بس سروس"معاہدے میں توسیع کا جائزہ لے گی۔ اجلاس میں سرمایہ کاری بورڈ اور کراچی انفراسٹرکچر ڈویلپمنٹ بورڈ کی تشکیلِ نو کی سمری بھی زیرِ غور آئے گی۔ وفاقی کابینہ میں ہوا بازی پالیسی 2019ء منظوری کے لئے پیش کی جائے گی۔
پاکستان سکھ گوردوارہ پربندھک کمیٹی کی تشکیلِ نو کا بھی کابینہ جائزہ لے گی۔ اجلاس میں پی ٹی ڈی سی میں غیر قانونی بھرتیوں کا معاملہ بھی زیرِ غور آئے گا۔ کابینہ مختلف اداروں میں تعیناتیوں کی منظوری دینے کے ساتھ اقتصادی رابطہ کمیٹی اور کابینہ کمیٹی توانائی کے فیصلوں کی توثیق بھی کرے گی۔
