اسلام آباد: (دنیا نیوز) سوشل میڈیا پر ویڈیو منظر عام پر افسران کی دوڑیں لگ گئیں۔ وزارت خارجہ نے حریم شاہ کی اہم کمیٹی روم تک رسائی کی تحقیقات شروع کر دیں۔ اس بات کا پتا چلایا جا رہا ہے کہ خاتون کس افسر کی کلیئرنس کے بعد دفتر خارجہ میں داخل ہوئیں؟ دفتر خارجہ کی انٹری لاگ بک کی بھی چھان بین کی جانے لگی۔
تفصیلات کے مطابق اب وزرارت خارجہ میں بھی ٹک ٹاک ویڈیو بننے لگی ہیں۔ ٹک ٹاک گرل حریم شاہ کی ایک اور ویڈیو نے تہلکہ مچا دیا ہے۔ وزارت خارجہ کے اہم کمیٹی روم میں وہ اس جگہ پہنچ گئیں جہاں اہم اجلاس ہوتے ہیں۔
ویڈیو سوشل میڈیا پر وائرل ہونے پر وزرات خارجہ نے نوٹس لیتے ہوئے معاملے کی تحقیقات کا بھی حکم دیدیا ہے۔ غیر متعلقہ خاتون اتنی اہم جگہ تک کیسے پہنچی ؟ اس پر کئی سوالات کھڑے ہوئے ہیں۔
ویڈیو میں دیکھا جا سکتا ہے کہ ٹک ٹاک گرل حریم شاہ بغیر کسی خوف کے وزارت خارجہ کے اہم کمیٹی روم میں گھومتی پھرتی رہیں اور صدارتی چیئر پر بھی براجمان ہوئیں۔
یہ بھی پڑھیں: ٹک ٹاک گرل حریم شاہ کا وزارت خارجہ کے اہم کمیٹی روم میں مٹر گشت، ویڈیو وائرل
غیر متعلقہ خاتون کو کمیٹی روم تک پہنچنے کی اجازت کس نے دی؟ انہیں کیوں نہیں روکا گیا؟ اتنی حساس جگہ پر جہاں ملک کیلئے اہم فیصلے ہوتے ہیں، اس لاپرواہی کا ذمہ دار کون ہے؟ دیدہ دلیری کی اس حرکت نے سیکورٹی پر بھی کئی سوال کھڑے کر دیے ہیں۔
ذرائے کے مطابق سوشل میڈیا پر ویڈیو منظر عام پر آنے کے بعد افسران کی دوڑیں لگ گئی ہیں۔ وزارت خارجہ نے حریم شاہ کی اہم کمیٹی روم تک رسائی کی تحقیقات شروع کر دی ہیں۔ اس بات کا پتا چلایا جا رہا ہے کہ خاتون کس افسر کی کلیئرنس کے بعد دفتر خارجہ میں داخل ہوئیں۔ سی سی ٹی وی فوٹیج کا ریکارڈ دیکھا جا رہا ہے جبکہ دفتر خارجہ کی انٹری لاگ بک کی بھی چھان بین کی جانے لگی ہے۔
خیال رہے کہ حریم شاہ اس سے پہلے بھی حکومتی دفاتر میں کئی ایسی ویڈیو بنا چکی ہے۔ شہریوں نے خاتون کو ان حرکات پر سخت تنقید کا نشانہ بنایا ہے۔
