اسلام آباد: (دنیا نیوز) مشیر داخلہ شہزاد اکبر نے اپنے ایک ویڈیو بیان میں کہا ہے کہ احسن اقبال نے اینٹی منی لانڈرنگ ایکٹ میں ترامیم پر قوم کو گمراہ کرنے کی کوشش کی۔
ان کا کہنا تھا کہ کاروباری افراد کو 180 دن کیلئے بند کرنے کی خبر سفید جھوٹ ہے۔ یا تو ان کے علم میں نہیں کہ ترامیم کیا ہیں یا وہ قوم کو گمراہ کر رہے ہیں۔
شہزاد اکبر نے کہا کہ اینٹی منی لانڈرنگ ایکٹ میں اس طرح کی کوئی ترمیم سرے سے تھی ہی نہیں، اینٹی منی لانڈرنگ ایکٹ میں ترمیم فیٹف کی سفارشات کی روشنی میں ہیں۔
مشیر داخلہ کا کہنا تھا کہ قوانین میں اینٹی منی لانڈرنگ کے حوالے سے خامیوں کو دور کیا جا رہا ہے۔ سزا 5 سے بڑھا کر 10 سال اور جرمانے میں بھی اضافہ کیا جا رہا ہے۔
احسن اقبال نے ایک بار پھر قوم کو گمراہ کرنے کی کوشش کی، منی لانڈرنگ بل میں کسی کو ۱۷۰ دن تو کیا ۱ دن قید کی شق نہیں میرا چیلنج ہے اسمبلی میں شق وار مذاکرہ کر لیں پوری قوم جان لے گی سچ کیا ہے @PTIofficial اصل ایشو نیب اور آپکی ذاتی منی لانڈرنگ ہے https://t.co/O8K3MhGJmQ pic.twitter.com/TtxXluQoJs
— Mirza Shahzad Akbar (@ShazadAkbar) August 23, 2020
انہوں نے اپنے ویڈیو بیان میں کہا کہ حکومت کی تمام ترامیم فیٹف اور اے پی جی کی سفارشات کے مطابق ہیں۔ اپوزیشن کا نیب کی جانب سے منی لانڈرنگ کی تفتیش پر اعتراض ہے۔ مسلم لیگ (ن) چاہتی ہے کہ اینٹی منی لانڈرنگ سے نیب کو نکال دیا جائے۔
ان کا کہنا تھا کہ یہ ہے وہ این آر او جو وہ مانگ رہے ہیں، جو کسی صورت نہیں ملے گا۔ اینٹی منی لانڈرنگ میں نیب کا نام پہلے سے موجود ہے۔
