گلگت : (دنیا نیوز) پاکستان پیپلز پارٹیکے چیئرمین بلاول بھٹو زرداری کا کہنا ہے کہ جنوری تک وعدہ ہے اسلام آباد پہنچ کر نااہل حکومت کو گھربھیجیں گے۔
گلگت بلتستان کے ضلع غذر میں جلسے سے خطاب کرتے ہوئے بلاول کا کہنا تھا کہ ہماری جماعت شہیدوں کی جماعت ہے تو غذر شہیدوں کی سرزمین ہے، غذر کے عوام نے ملک کی خاطر اپنی جانیں قربان کیں۔
انہوں نے کہا کہ آپ کی حقوق کی جدوجہد آج کی نہیں، آپ مسلسل اس جدوجہد کو آگے لے کر چل رہے ہیں، اس تحریک میں جیالوں کا خون شامل ہے، جب غذر کے عوام نے شہادتیں دیں تو ان کا حق ہے کہ ان کی قسمت کا فیصلہ وہ خود کریں۔
بلاول بھٹو زرداری نے وفاقی حکومت پر تنقید کرتے ہوئے کہا کہ لوگوں کو نظر آرہا ہےکہ آپ نے پاکستان کے ساتھ کیا کیا، حکومت نےمہنگائی اور بےروزگاری میں اضافہ کیا، عوام احتجاج کر رہے ہیں، تاریخی بے روزگاری ہے اور ملک کا ہر طبقہ احتجاج کر رہا ہے۔
ان کا کہنا تھا کہ ہم عوام کو ریلیف دیتے ہیں، یہ تکلیف دیتے ہیں، یہ صرف امیروں کو ریلیف دیتے ہیں اور ان کے لیے ایمنسٹی اسکیم لے کر آتے ہیں، پاکستان پیپلز پارٹی نے تنخواہوں میں 150 فیصد اضافہ کیا، پیپلز پارٹی نے بےنظیر انکم سپورٹ پروگرام شروع کیا، پینشن کی مد میں 100 فیصد اضافہ کیا اور سرحدوں کی حفاظت کرنے والوں کی تنخواہوں میں 175 فیصد تک اضافہ کیا۔
گلگت کو صوبہ بنانے کے حوالے سے پی پی چیئر مین کا کہنا تھا کہ اشاروں پر چلنے والے بھی آپ کی بات مان چکے ہیں اور گلگت کو صوبہ بنانے کی بات کر رہے ہیں، ان سے پوچھیں ان کے منشور میں صوبے کی بات کیوں نہیں، اگر گلگت کو صوبہ بنانا ہے تو سپریم کورٹ سے پٹیشن واپس لو جبکہ پیپلز پارٹی کی گلگت کو صوبے کا درجہ دلائے گی۔
انہوں نے کہا کہ سنا ہے ایک وزیر یہاں ووٹ خریدنے آئے ہیں لیکن گلگت کے عوام بکنے والے نہیں، آپ پیسے ان سے لیں لیکن ووٹ پیپلز پارٹی کو دیں اور بھٹو اور بینظیر بھٹو کے مشن کو پورا کرنے کا موقع دیں۔ میں جانتا ہوں کہ اگر شہیدوں کے سرزمین کے عوام ہمارے ساتھ ہیں تو کوئی طاقت ہمارا راستہ نہیں روک سکتی، ہم نہ صرف پیپلز پارٹی کو یہاں سے جتوا کر کٹھ پتلی کو ناکام کریں گے بلکہ جنوری میں اسلام آباد پہنچ رہے ہیں اور کٹھ پتلی، نااہل اور ظالم وزیر اعظم کو گھر بھیج دیں گے۔
واضح رہے کہ بلاول بھٹو زرداری گزشتہ کئی روز سے گلگت بلتستان کے مختلف اضلاع میں بھرپور انتخابی مہم چل رہے ہیں اور عوامی و کارکنان کے جلسوں سے خطاب کر رہے ہیں۔
