لاہور: (دنیا نیوز) ہفتہ شان رحمت اللعالمین ﷺ کے سلسلے میں وزیراعلیٰ پنجاب سردار عثمان بزدار نے آج شب ایوان اقبال میں محکمہ اوقاف کے زیر اہتمام محفل سماع میں شرکت کی۔
محفل سماع کا آغاز تلاوت قرآن مجید سے کیا گیا۔ نبی پاک ﷺ کے حضور نعت رسول ﷺ کی صورت میں ہدیہ عقیدت پیش کیا گیا۔ محفل سماع میں معروف قوال ابو محمد نے اپنے فن کا مظاہرہ کیا۔ قوال ابو محمد نے حمدیہ اور نعتیہ قوالی سے سماں باندھ دیا۔ قوال ابو محمد اور ہمنواؤں نے عارفانہ اور صوفیانہ کلام بھی پیش کیا۔
وزیراعلیٰ عثمان بزدار اور حاضرین نے فن قوالی کے دل موہ لینے والے انداز کو سراہا ان کی پرفارمنس کی تعریف کی۔ قوال ابو محمد اور ہمنواؤں کی قوالیوں پر حاضرین پر وجد وسرور طاری ہو گیا۔
وزیراعلی عثمان بزدار نے قوال ابو محمد اور ہمنواؤں کو سٹیج پر جا کر داد دی۔ ان کا کہنا تھا کہ ہفتہ شان رحمت اللعالمین ﷺ پورے صوبے میں عقیدت واحترام سے منایا گیا۔
ان کا کہنا تھا کہ پنجاب بھر میں نعتیہ مشاعرے، محافل سماع اور عالمی مشائخ و علماء کانفرنس کا انعقاد کیا گیا۔ تعلیمی اداروں میں نعت، تقریری، حسن قرآت اور کوئز مقابلے ہوئے۔
انہوں نے اعلان کیا کہ آئندہ سال بھی ہفتہ شان رحمت اللعالمین ﷺ عقیدت واحترام سے منایا جائے گا۔ صوبائی وزرا راجہ بشارت، میاں محمود الرشید، میاں اسلم اقبال، کمشنر لاہور ڈویژن، سیکرٹری اوقاف، سیکرٹری اطلاعات، اعلیٰ حکام، مذہبی شخصیات اور لوگوں نے محفل سماع میں شرکت کی۔
