اسلام آباد: (دنیا نیوز) پی ڈی ایم وفد نے تحریک انصاف کا فارن فنڈنگ کیس جلد نمٹنے کے لئے چیف الیکشن کمشنر کو یاد داشت پیش کر دی۔ جس میں کہا گیا کہ 23 اکاؤنٹس کی تفصیلات فوری طور پر فراہم کی جائے، درخواست گزار اکبر ایس بابر کو تحفظ دیا جائے۔
پاکستان مسلم لیگ نون کے رہنما احسن اقبال نے میڈیا سے گفتگو کرتے ہوئے کہا کہ پی ڈی ایم کے وفد نے چیف الیکشن کمشنر سے ملاقات کی، کل کے مظاہرے کا مقصد پی ٹی آئی فان فنڈنگ کیس میں احتجاج ریکارڈ کرانا تھا، تمام قانونی مسائل کے حل کے باوجود بر وقت سکروٹنی نہیں کی گئی، الیکشن کمیشن سے پہلے بھی درخواست کی تھی اس معاملے کو جلد از جلد نمٹایا جائے، تحریک انصاف نے غیر ملکی فنڈز لیے بلکہ منی لانڈرنگ بھی کی، تحریک انصاف اب غیر ملکی فنڈنگ کی ذمہ داری ایجنٹس پر ڈال رہی ہے۔
احسن اقبال کا کہنا تھا فارن فنڈنگ کیس کی روزانہ کی بنیاد پر سماعت کی جائے، سکروٹنی کمیٹی کو ایک ماہ میں تحقیقات مکمل کرنے کا کہا تھا، تحریک انصاف نے ممنوعہ ذرائع سے فنڈنگ لی۔
