اسلام آباد: (دنیا نیوز) وفاقی وزیر برائے انفارمیشن ٹیکنالوجی سید امین الحق نے کہا ہے کہ پانچ منٹ کال کے بعد 75 پیسے ٹیکس کے نفاذ کو ختم کر دیا جائے گا، اس معاملہ پر انڈسٹری اور وزارت ایک پیج پر ہیں، وزیراعظم نے اس معاملہ پر نظر ثانی کی یقین دہانی کرائی ہے۔
وفاقی وزیر نے ان خیالات کا ایک تقریب سے خطاب کرتے ہوئے کیا۔ ان کا کہنا تھا کہ وفاقی حکومت نے وزارت انفارمیشن ٹیکنالوجی کے ذریعے جنوبی پنجاب کے لئے پسماندہ اضلاع کے عوام کو تیز ترین فور جی موبائل انٹرنیٹ سروس کی فراہمی کے لئے ساڑھے 6 ارب روپے کے منصوبوں پر کام شروع کر دیا ہے۔
امین الحق نے کہا کہ ملتان اور خانیوال سے ملحقہ دیہاتوں کو ہائی سپیڈ براڈ بینڈ سروس کی فراہمی کے لئے یونیورسل سروسز فنڈ اور جاز موبائل کمپنی کے مابین معاہدہ پر دستخط کر دیئے گئے ہیں۔ اضافی سپیکٹرم کی نیلامی کا عمل آئندہ ماہ مکمل ہو جائے گا، جس سے سرکاری خزانے میں اربوں روپے جمع ہوں گے۔
ان کا کہنا تھا کہ ملک میں 2022ء تک فائیو جی کی سہولت دستیاب ہو جائے گی۔ سیکرٹری آئی ٹی ہر دو ماہ بعد اس ٹیکنالوجی کے لئے باقاعدہ اجلاس منعقد کر رہے ہیں۔ وزیراعظم عمران خان کے وژن کے مطابق 2023ء میں پارلیمنٹ کو ڈیجیٹل کرتے ہوئے پیپر لیس بنا دیا جائے گا۔
تقریب سے خطاب میں وفاقی وزیر آئی ٹی سید امین الحق نے وزیر خارجہ شاہ محمود قریشی کی آمد کا شکریہ ادا کرتے ہوئے ڈیجیٹل پاکستان ویژن کی جانب وزارت آئی ٹی کے تیز رفتار سفر کے حوالے سے آگاہ کیا۔
انہوں نے بتایا کہ صرف جنوبی پنجاب کیلئے براڈ بینڈ سروسز کے 6 اور آپٹیکل فائبر کے 3 منصوبوں پر مجموعی طور پر 6 ارب 47 کروڑ روپے خرچ کررہے ہیں۔ ان منصوبوں کی تکمیل سے 38 لاکھ افراد کو ہائی سپیڈ موبائل براڈ بینڈ اور تقریباً 2 ہزار مربع کلومیٹر کے علاقے کو فائبر آپٹیکل کیبل سے منسلک کر دیا جائے گا۔
سید امین الحق کے مطابق ان منصوبوں کے تحت 846 گاؤں اور دیہاتوں میں مقیم تقریباً 26 لاکھ افراد مستفید ہوں گے ان منصوبوں پر 50 سے 75 فیصد تک کام مکمل کیا جا چکا ہے۔
ان کا کہنا تھا کہ اسی طرح ڈیرہ غازی خان ڈویژن کے 4 اضلاع ڈیرہ غازی خان، لیہ، مظفرگڑھ اور راجن پور میں ہائی اسپیڈ براڈ بینڈ سروسز کے 2 منصوبوں پر ایک ارب 14 کروڑ 12 لاکھ روپے جبکہ آپٹیکل فائبر کیبل بچھانے کے 3 منصوبوں پر 4 ارب 47 کروڑ روپے خرچ کررہے ہیں۔
ان منصوبوں کی تکمیل سے تقریبا 2 ہزار مربع کلومیٹر کا علاقہ فائبر آپٹیکل کیبل سے منسلک ہوجائے گا۔ جبکہ براڈ بینڈ سروسز منصوبوں پر 25 فیصد سے زائد کام ہوچکا ہے منصوبوں کی تکمیل سے 393 دیہاتوں اور گاں کی ساڑھے آٹھ لاکھ سے زائد کی آبادی کو تیز ترین براڈ بینڈ سروسز ملیں گی۔
