اسلام آباد: (دنیا نیوز) احتساب عدالت اسلام آباد نے ایل این جی ریفرنس کے ملزمان کی نیب ترمیمی آرڈیننس کی بنیاد پر ریفرنس خارج کرنے کی استدعا پر نیب سے جواب طلب کرلیا۔
احتساب عدالت کے جج اعظم خان نے ایل این جی ریفرنس کی سماعت کی۔ ایل این جی ریفرنس میں تمام نجی شخصیات نے ریفرنس خارج کرنے کی استدعا کر دی اور کہا کہ کابینہ اور کمیٹی فیصلوں اور طریقہ کار کی غلطی وغیرہ سمیت دیگر الزامات کو نیب دائرہ اختیار سے نکال دیا گیا ہے، تاہم نیب نے ایل این جی ریفرنس ختم کرنے کی مخالفت کر دی اور کہا کہ کابینہ فیصلوں کو جو نیب سے استشنٰی دیا گیا وہ 6 اکتوبر کے بعد ہوگا۔
احتساب عدالت نے نیب اور ملزمان کے وکلاء سے 26 اکتوبر تک جواب طلب کرلیا کہ بتایا جائے کہ نیب ترمیمی آرڈیننس کے بعد ایل این جی ریفرنس کا ٹرائل ہوگا یا نہیں۔
