کراچی: (دنیا نیوز) نیب نے سپیکر سندھ اسمبلی آغا سراج درانی کی گرفتاری کیلئے ان کے گھر پر چھاپہ مارا ہے۔
سندھ ہائیکورٹ سے درخواست ضمانت مسترد ہونے کے بعد آغا سراج درانی کی گرفتاری کیلئے نیب ٹیم ان کی رہائشگاہ پہنچ گئی۔ جہاں پر گزشتہ دو گھنٹے گزر جانے کے باوجود نیب کی ٹیم آغا سراج درانی کو گرفتار نہ کر سکی۔ جس کے بعد نیب ٹیم نے اضافی ٹیم طلب کرلی ہے۔
دوسری طرف آغا سراج کے حامیوں کی آمد کا سلسلہ جاری ہے۔
اُدھر آغا سراج کے عزیز آغا اسد نے میڈیا سے گفتگو کرتے ہوئے کہا کہ گھر میں فیملی موجود ہے، چادر اور چار دیواری کا تقدس پامال نہیں کرنے دینگے، نیب کی ٹیم کو گھر میں جانے کی اجازت نہیں دینگے۔
اس سے قبل سندھ ہائیکورٹ نے اثاثہ جات کیس میں سپیکر سندھ اسمبلی آغا سراج درانی سمیت 8 ملزمان کی درخواست ضمانت مسترد کر دی۔
جسٹس ندیم اختر اور جسٹس اقبال کلہوڑو نے گذشتہ ہفتے فیصلہ محفوظ کیا تھا۔ سندھ ہائیکورٹ نے آغا سراج درانی اور دیگر کی ضمانت پر فیصلہ جاری کیا۔ عدالت نے آغا سراج کی اہلیہ، بیٹا، تین بیٹیاں اور ایک ملزم کی درخواست ضمانت منظور کرلی۔
خیال رہے اسپیکر سندھ اسمبلی پر ایک ارب سے زائد غیر قانونی آمدن سے اثاثے بنانے کا الزام ہے۔ ملزمان کے خلاف احتساب عدالت میں ریفرنس زیر سماعت ہے۔ سندھ ہائیکورٹ آغا سراج درانی اور دیگر کی ضمانت منظور کر چکی تھی۔
نیب نے ہائیکورٹ کے فیصلے کو سپریم کورٹ میں چیلنج کیا تھا۔ سپریم کورٹ نے ضمانتوں پر دوبارہ دلائل سننے کے لئے معاملہ واپس ہائیکورٹ بجھوایا تھا۔ چیف جسٹس ہائیکورٹ نے ضمانت پر فیصلے کے لئے دو ججز پر خصوصی بینچ تشکیل دیا تھا۔
