اسلام آباد: (دنیا نیوز) سابق آرمی چیف جنرل (ر) قمر جاوید باجوہ کا ٹیکس ڈیٹا لیک کرنے والے ملزمان کا دو روزہ جسمانی ریمانڈ منظور کر لیا گیا۔
اسلام آباد کی ڈسٹرکٹ اینڈ سیشن کورٹ میں سماعت کے دوران جوڈیشل مجسٹریٹ عمر شبیر نے ایف بی آر سے سابق آرمی چیف جنرل ریٹائرڈ قمر جاوید باجوہ کے مبینہ ٹیکس ڈیٹا لیک کے معاملے پر ایف بی آر افسران شہزاد نیاز،ارشد علی اور عدیل اشرف کا دو روزہ جسمانی ریمانڈ منظور کر لیا۔
ایف آئی اے کی جانب سے ملزمان کیلئے 5 روزہ جسمانی ریمانڈ کی استدعا کی گئی، تفتیشی افسر نے عدالت کو بتایا کہ ملزم ارشدعلی نے صحافی کو ڈیٹا لیک کرنے کے بعد اپنا موبائل پھینک دیا، ملزمان شہزاد نیاز اور عدیل اشرف نے بھی موبائل سے ڈیٹا ڈیلیٹ کردیا۔
تفتیشی افسر نے کہا کہ تینوں ملزمان کے موبائل فرانزک کیلئے بھجوا دیئے گئے ہیں، اس موقع پر عدالت سے استدعا کی گئی کہ ملزمان کا مزید تفتیش کیلئے کسٹڈی میں رہنا ضروری ہے، جس پر عدالت نے تینوں ملزمان کا دو روزہ جسمانی ریمانڈ منظور کرتے ہوئے تحریری فیصلہ جاری کر دیا۔
